នៅឯកន្លែងបើកការតាំងពិពណ៌យន្តហោះដ៏ធំបំផុតរបស់ប្រទេស នាថ្ងៃចន្ទ (ទី១០ ខែកុម្ភៈ) រដ្ឋមន្ត្រីក្រសួងការពារជាតិ លោក Rajnath Singh បាននិយាយថា ប្រទេសឥណ្ឌា ប្ដេជ្ញាលើកកម្ពស់ការផលិត និងការនាំចេញលើគ្រឿងយុទ្ធោបរណ៍ការពារជាតិ ក្នុងរយៈពេលប៉ុន្មានឆ្នាំខាងមុខ ពោលគឺជាអ្វីដែលមហិច្ឆតាយោធារបស់ប្រទេស នឹងផ្តោតជាសំខាន់។

ឥណ្ឌា ដែលជាប្រទេសនាំចូលអាវុធធំជាងគេលើពិភពលោក បានសង្កត់ធ្ងន់លើតម្រូវការ ក្នុងការធ្វើទំនើបកម្មយោធារបស់ខ្លួន និងជំរុញការផលិតផ្នែកការពារជាតិ ក្នុងស្រុក ដើម្បីទប់ទល់នឹងគូប្រជែងចិន ដែលកំពុងកើនឡើងទាំងកម្លាំងយោធា និងឥទ្ធិពល នៅតំបន់អាស៊ីខាងត្បូង។

លោក Singh បាននិយាយថា តម្លៃផលិតកម្មការពារជាតិ ក្នុងស្រុករបស់ឥណ្ឌា នឹងកើនឡើងដល់ជាង ១,២៥សែនកោដិរូពី (១៤,២៤ពាន់លានដុល្លារ) ក្នុងឆ្នាំសារពើពន្ធ ដែលបញ្ចប់ក្នុងខែមីនា ខណៈដែលការនាំចេញការពារជាតិរបស់ខ្លួន នឹងមានលើសកំណត់ត្រា ២១០ពាន់លានរូពីជាលើកដំបូង ក្នុងរយៈពេលដូចគ្នា។

នៅឯកម្មវិធីដែលបានចាប់ផ្តើមជាមួយនឹងយន្តហោះចម្បាំងរបស់ប្រទេសហោះហើរឆ្លងកាត់ជាក្បួន លើផ្ទៃមេឃដ៏ស្រឡះល្អ លោកបាននិយាយថា៖ «យើងមានការប្តេជ្ញាចិត្តទាំងស្រុង ក្នុងការបង្កើនចំនួនទាំងនេះឲ្យបានកាន់តែច្រើនឡើងៗ នៅក្នុងប៉ុន្មានឆ្នាំខាងមុខនេះ»។

ទីក្រុងញូវដែលីមានគោលបំណងសិក្សាពីលទ្ធភាពនៃការផលិតគ្រឿងយុទ្ធោករណ៍ការពារជាតិរួម និងស្វែងរកកិច្ចព្រមព្រៀងយោធាដែលមានតម្លៃរាប់ពាន់លានដុល្លារ នៅឯកន្លែងតាំងពិព័រណ៍យន្តហោះ Aero India ដែលបានចាប់ផ្តើម នៅថ្ងៃចន្ទនេះ នាទីក្រុង Bengaluru ភាគខាងត្បូង។

បើយោងតាមក្រសួងការពារជាតិឥណ្ឌា បានឲ្យដឹងថា ក្រុមហ៊ុនបរទេសជាង ១៥០ កំពុងចូលរួមក្នុងព្រឹត្តិការណ៍ដែលដំណើរការរហូតដល់ថ្ងៃសុក្រ ខណៈដែលរដ្ឋមន្ត្រីការពារជាតិ ឬតំណាងមកពីប្រទេសប្រហែល ៣០ ត្រូវបានគេរំពឹងថា នឹងធ្វើដំណើរទៅដល់កន្លែងពិព័រណ៍នេះ៕