ទុយនីស៊ី៖ ពលរដ្ឋទុយនីស៊ីរាប់ពាន់នាក់ ដែលកំពុងតវ៉ាប្រឆាំងការក្ដាប់អំណាចរបស់លោកប្រធានាធិបតី Kais Saied បានព្យាយាមដើរក្បួនទៅកាន់រដ្ឋសភាដែលបានផ្អាកកាលពីថ្ងៃអាទិត្យ ខណៈនគរបាលរាប់រយនាក់បានបិទផ្លូវក្បែរតំបន់នោះ។ សារព័ត៌មាន Reuters បានរាយការណ៍ថា ក្រុមអ្នកតវ៉ាបានប៉ះទង្គិចគ្នាជាមួយនគរបាល ខណៈពួកគេព្យាយាមរុះរើរនាំងបាំងផ្លូវជិតសភា និងទាមទារឲ្យលោក Saied ប្រគល់សភា និងការដឹកនាំបែបលទ្ធិប្រជាធិបតេយ្យធម្មតាត្រឡប់មកវិញ។
ក្រុមបាតុករបានស្រែកស្រុះៗគ្នាថា បណ្ដេញលោក Kais Saied ចេញ និងពាក្យថា សេរីភាព សេរីភាព បញ្ចប់រដ្ឋនគរបាល ខណៈពួកគេទាញរនាំងបិទផ្លូវឆ្ពោះទៅកាន់រដ្ឋសភានៅវិមាន Bardo របស់រដ្ឋធានី។ មន្ត្រីមួយរូបមកពីគណបក្សឆ្វេងនិយមទុយនីស៊ីបានប្រាប់សារព័ត៌មាន AFP ថា ក្រុមអ្នកតវ៉ាបានបិទផ្លូវតូច-ធំទាំងអស់ និងផ្លូវសម្រាប់ទោចក្រយានយន្តផងដែរ។ បន្ទាប់ពីបិទរដ្ឋ លោក Saied បានបិទ ស្ថាប័ននានា និងរដ្ឋធម្មនុញ្ញ។ លោកបានបិទប្រទេសទាំងមូល។ កាលពីថ្ងៃទី២៥ ខែកក្កដា លោក Saied បានបណ្ដេញនាយករដ្ឋមន្ត្រីរបស់លោកចេញពីតំណែង បិទសភា និងដណ្ដើមកាន់កាប់អំណាច។ កាលពីខែកញ្ញា លោកបានផ្អាកដោយផ្នែកនៃរដ្ឋធម្មនុញ្ញឆ្នាំ២០១៤ របស់ប្រទេសទុយនីស៊ី និងឡើងកាន់អំណាចដោយខ្លួនឯងដោយប្រើតែក្រឹត្យ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
