អង្គការឃ្លាំមើលរដ្ឋាភិបាលឯករាជ្យ OIG បានព្រមានកាលពីថ្ងៃចន្ទ (១០ កុម្ភៈ) ថា ចំណាត់ការរបស់រដ្ឋបាលលោក Donald Trump ក្នុងការរុះរើទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ឬហៅថា USAID បានធ្វើឱ្យបាត់បង់សមត្ថភាពរបស់ទីភ្នាក់ងារនេះក្នុងការត្រួតពិនិត្យយ៉ាងត្រឹមត្រូវណាមួយ នៃជំនួយដែលមិនបានចំណាយមានតម្លៃ ៨,២ពាន់លានដុល្លារ។

របាយការណ៍របស់ទីភ្នាក់ងារអធិការកិច្ច OIG របស់អង្គការ USAID នេះក៏បាននិយាយផងដែរថា ការលើកលែងដែលចេញដោយក្រសួងការបរទេសដើម្បីធ្វើឱ្យ "ជំនួយមនុស្សធម៌សង្គ្រោះអាយុជីវិត" ត្រូវបានលើកលែងពីក្នុងការបង្កកជំនួយបរទេសរបស់លោកប្រធានាធិបតី Trump ត្រូវបានរារាំងដោយការកាត់បន្ថយបុគ្គលិក និងភាពមិនប្រាកដប្រជាពីជំនួយប្រភេទណាដែលមិនត្រូវបានអនុញ្ញាត។

កម្មវិធី USAID រាប់រយដែលគ្របដណ្តប់លើជំនួយរាប់ពាន់លានដុល្លារទូទាំងពិភពលោក បានបញ្ឈប់ បន្ទាប់ពីលោក Trump កាលពីថ្ងៃទី២០ ខែមករា បានបញ្ជាឱ្យបង្កកជំនួយបរទេសភាគច្រើន ដោយនិយាយថា លោកចង់ធានាថាជំនួយនោះស្របតាមគោលនយោបាយ "យកអាមេរិកជាធំ" របស់លោក។

រដ្ឋបាលរបស់លោក Trum បានចាត់វិធានការជាច្រើនដើម្បីរុះរើទីភ្នាក់ងារ USAID ដែលមានបុគ្គលិកជាង ១០.០០០នាក់ទាំងនៅក្នុង និងក្រៅប្រទេស ហើយអាចដាក់បញ្ចូលទីភ្នាក់ងារនោះទៅក្នុងក្រសួងការបរទេស៕