ប្រធានការបរទេសរបស់ទីក្រុងហុងកុង លោក Eric Chan បាននិយាយនៅថ្ងៃអង្គារ (១១ កុម្ភៈ) នេះថា ទីក្រុងហុងកុង នឹងដាក់ពាក្យបណ្តឹងស្តីពីការដំឡើងពន្ធថ្មីរបស់សហរដ្ឋអាមេរិក ដែលបានដាក់លើទីក្រុងនេះ ទៅកាន់អង្គការពាណិជ្ជកម្មពិភពលោក WTO ដោយអះអាងថា សហរដ្ឋអាមេរិក បានព្រងើយកន្តើយទាំងស្រុងចំពោះស្ថានភាពរបស់ទីក្រុងដែលជាទឹកដីគយដាច់ដោយឡែក។

លោក Chan ដែលជាមន្ត្រីលំដាប់ទី២របស់ទីក្រុងគ្រប់គ្រងដោយប្រទេសចិនមួយនេះ បានប្រាប់អ្នកយកព័ត៌មានថា "នេះពិតជាមិនស្របនឹងច្បាប់របស់ WTO ទេ ហើយអាមេរិកបានបដិសេធទាំងស្រុងថា ហុងកុងគឺជាទឹកដីគយដាច់ដោយឡែក"។

លោក Chan កំពុងឆ្លើយតបទៅនឹងការសម្រេចចិត្តរបស់សហរដ្ឋអាមេរិក ក្នុងការដាក់ពន្ធ ១០% លើទំនិញពីមជ្ឈមណ្ឌលហិរញ្ញវត្ថុអាស៊ីមួយនេះ ខណៈប្រធានាធិបតីអាមេរិក លោក Donald Trump កំណត់គោលដៅនាំចូលរបស់ចិន។

ហុងកុងត្រូវបានគេស្គាល់ជាយូរមកហើយថាជាមជ្ឈមណ្ឌលពាណិជ្ជកម្មសេរី និងបើកចំហ ប៉ុន្តែការដាក់ច្បាប់សន្តិសុខជាតិដ៏ធំទូលាយក្នុងឆ្នាំ២០២០ របស់ចិន លើទីក្រុងហុងកុង បានទាក់ទាញការរិះគន់ពីសហរដ្ឋអាមេរិក។ ក្រោយមក អាមេរិកបានកំណត់ថា ទំនិញដែលផលិតនៅហុងកុងសម្រាប់ការនាំចេញទៅអាមេរិក ចាំបាច់ត្រូវដាក់ស្លាកថាផលិតនៅក្នុងប្រទេសចិន ដោយបញ្ចប់នូវគុណសម្បត្តិប្រកួតប្រជែងដ៏យូរអង្វែងមួយរបស់ហុងកុង ក្នុងនាមជាមជ្ឈមណ្ឌលពាណិជ្ជកម្ម៕