ក្រសួងយុត្តិធម៌អាមេរិក កាលពីថ្ងៃចន្ទ (ទី១០ ខែកុម្ភៈ) បានបង្គាប់បញ្ជាឲ្យរដ្ឋអាជ្ញាសហព័ន្ធ នៅទីក្រុងញូវយ៉កទម្លាក់ការចោទប្រកាន់ពីបទពុករលួយលើអភិបាលក្រុងញូវយ៉ក លោក Eric Adams ដោយអះអាងថា ករណីនេះ កំពុងរាំងស្ទះលទ្ធភាពរបស់លោក ក្នុងការជួយដល់ការបង្ក្រាបរបស់ប្រធានាធិបតី លោក Donald Trump លើជនអន្តោប្រវេសន៍ខុសច្បាប់។

សេចក្តីណែនាំនេះ ស្មើនឹងការអន្តរាគមន៍ពិសេសពីមន្ត្រីក្រសួងយុត្តិធម៌អាមេរិក ក្នុងបញ្ហាឧក្រិដ្ឋកម្មកម្រិតខ្ពស់ដែលលើកឡើងមកប្ដឹងដោយរដ្ឋអាជ្ញា នៅតំបន់ភាគខាងត្បូងនៃទីក្រុងញូវយ៉ក ជាការិយាល័យដែលតែងតែការពារឯករាជ្យភាពរបស់ខ្លួនកុំឲ្យមានការពាក់ព័ន្ធនឹងឥស្សរជននយោបាយ នៅទីក្រុងវ៉ាស៊ីនតោនឌីស៊ី។

ក្នុងខែកញ្ញាឆ្នាំមុន លោក Adams ដែលជាសមាជិករបស់បក្សប្រជាធិបតេយ្យ ត្រូវបានចោទប្រកាន់ជាផ្លូវការចំនួន ៥ករណី ពាក់ព័ន្ធនឹងការបានប្រយោជន៍ការធ្វើដំណើរពីមន្រ្តីទួរគី និងវិភាគទាននយោបាយពីជនបរទេស ជាថ្នូរនឹងការចាត់វិធានការ ដើម្បីផ្តល់អត្ថប្រយោជន៍ដល់ប្រទេសទួរគី។ លោកបានផ្ដល់ចម្លើយពីភាពគ្មានទោស ទាក់នឹងការចោទប្រកាន់ទាំងនោះ។

យ៉ាងណាក្ដី កាលពីល្ងាចទី១០ ខែកុម្ភៈ សំណៅរបស់តុលាការ បានបង្ហាញថា រដ្ឋអាជ្ញាមិនទាន់បានបញ្ជាក់ថា ខ្លួនគ្រោងនឹងទម្លាក់ចោលសំណុំរឿងនេះនោះទេ៕