នគរបាលបានប្រាប់ឲ្យដឹងថា យ៉ាងហោចណាស់មនុស្ស ៥នាក់ បានបាត់បង់ជីវិត នៅពេលដែលជនបំផ្ទុះគ្រាប់បែកអត្តឃាតដែលមានសារធាតុផ្ទុះជាប់នឹងខ្លួន បានបំផ្ទុះគ្រឿងផ្ទុះនោះ នៅខាងក្រៅធនាគារមួយ នៅភាគឦសានប្រទេសអាហ្វហ្គានីស្ថាន នាថ្ងៃអង្គារ (ទី១១ ខែកុម្ភៈ) នេះ។

នគរបាលបានប្រាប់ថា ការបំផ្ទុះនេះ បានកើតឡើងនៅវេលាម៉ោង ៨ និង៣៥នាទីព្រឹក ម៉ោងក្នុងស្រុក (ត្រូវនឹងម៉ោង ៤:០៥នាទី ម៉ោងសកល) នៅជិតសាខាធនាគារ Kabul ក្នុងខេត្ត Kunduz ដោយបានសម្លាប់សន្តិសុខរបស់ធនាគារ និងមនុស្ស ៤នាក់ផ្សេងទៀត ក្នុងនោះរួមទាំងជនស៊ីវិល និងសមាជិកនៃចលនាតាលីបង់ដែលកំពុងកាន់អំណាចរបស់ប្រទេសអាហ្វហ្គានីស្ថានផងដែរ។

ជាមួយគ្នានេះ អ្នកនាំពាក្យនគរបាលខេត្ត លោក Jumma Uddin Khakasr បានឲ្យដឹងថា មានអ្នករងរបួស ៧នាក់។ តែយ៉ាងណាក្ដី លោកមិនបាននិយាយថា នរណាដែលត្រូវបានគេជឿថា នៅពីក្រោយការវាយប្រហារនោះទេ ហើយរហូតមកដល់ពេលនេះ ក៏គ្មានក្រុមណាចេញមកទទួលខុសត្រូវនោះដែរ។

គួរបញ្ជាក់ថា ក្រុមសកម្មប្រយុទ្ធមកពីក្រុមរដ្ឋឥស្លាមអាហ្វហ្កានីស្ថាន បានធ្វើការបះបោរប្រឆាំងនឹងពួកតាលីបង់ ចាប់តាំងពីក្រុមនេះបានវិលមកកាន់អំណាចវិញ ក្នុងឆ្នាំ២០២១។ អាជ្ញាធរតាលីបង់ ប្រាប់ថា ក្រុមនេះ ភាគច្រើនត្រូវបានកម្ទេច ទោះបីជានៅតែបន្តធ្វើការវាយប្រហារ ក្នុងប្រទេសអាហ្វហ្គានីស្ថានក៏ដោយ៕