ប្រធានាធិបតីស្តីទីកូរ៉េខាងត្បូង លោក Choi Sang-mok នៅថ្ងៃអង្គារ (ទី១១ ខែកុម្ភៈ) នេះ បាននិយាយថា រដ្ឋាភិបាលរបស់លោក នឹងព្យាយាមឲ្យមានកិច្ចពិភាក្សាជាមួយរដ្ឋបាលសហរដ្ឋអាមេរិក អំពីការដំឡើងពន្ធ ២៥ភាគរយរបស់ទីក្រុងវ៉ាស៊ីនតោន លើការនាំចូលដែកថែប និងអាលុយមីញ៉ូម ដើម្បីឆ្លុះបញ្ចាំងពីផលប្រយោជន៍របស់ក្រុមហ៊ុនរបស់ខ្លួន។

លោក Choi បាននិយាយថា នាយកប្រតិបត្តិនៃក្រុមហ៊ុនធំៗរបស់កូរ៉េខាងត្បូងចំនួន ២០ក្រុមហ៊ុន គ្រោងនឹងទៅបំពេញទស្សនកិច្ច នៅសហរដ្ឋអាមេរិក នាពេលខាងមុខដ៏ខ្លីនេះ ខណៈដែលរដ្ឋាភិបាលក៏មានបំណងពិភាក្សា អំពីវិធានការឆ្លើយតបជាមួយប្រទេសជប៉ុន និងសហភាពអឺរ៉ុប (EU) ផងដែរ។

លោក Choi បានប្រាប់បន្តថា រដ្ឋាភិបាលកំពុងប្រឹងប្រែងយ៉ាងខ្លាំងក្លា ក្នុងគោលបំណងកសាងទំនាក់ទំនងជិតស្និទ្ធជាមួយរដ្ឋបាលរបស់ប្រធានាធិបតីអាមេរិក លោក Donald Trump ដើម្បីការពារផលប្រយោជន៍របស់ក្រុមហ៊ុនកូរ៉េខាងត្បូង។

នៅព្រឹកថ្ងៃទី១១ ខែកុម្ភៈនេះ រដ្ឋមន្ត្រីពាណិជ្ជកម្ម លោក Cheong In-kyo បាននិយាយថា ការដំឡើងពន្ធ ២៥ភាគរយរបស់លោក Trump ដែលនឹងត្រូវចូលជាធរមានក្នុងខែមីនា នឹងកាត់បន្ថយតម្រូវការដែកថែបរបស់សហរដ្ឋអាមេរិក និងធ្វើឲ្យប្រាក់ចំណេញរបស់អ្នកនាំចេញដែកថែបថយចុះ។

តែយ៉ាងណាក្ដី លោកបានបញ្ជាក់ថា ការដំឡើងពន្ធអាចផ្តល់ឱកាសឲ្យក្រុមហ៊ុនកូរ៉េខាងត្បូងស្វែងរកទីផ្សារនាំចេញថ្មី។ លោក Cheong បានបន្ថែមថា ប្រទេសកូរ៉េខាងត្បូងនឹង «ពិចារណាយ៉ាងហ្មត់ចត់» ថា តើមានឱកាសសម្រាប់ការចរចារពីការដំឡើងពន្ធគយនេះដែរ ឬទេ បើទោះបីជាលោក Trump បានសន្យាកាលពីថ្ងៃទី១០ ខែកុម្ភៈថា ការយកពន្ធខ្ពស់នេះ នឹងចូលជាធរមានដោយគ្មានករណីលើកលែង ឬការយោគយល់អ្វីឡើយ៕