ប្រធានាធិបតីកូរ៉េខាងត្បូងដែលត្រូវបានផ្អាកតំណែង គឺលោក Yoon Suk Yeol បានស្ដីបន្ទោសការប្រឆាំង «បង្កប់ដោយគំនិតព្យាបាទ» ទើបនាំឲ្យមានការសម្រេចចិត្តរបស់លោក ក្នុងការប្រកាសច្បាប់អាជ្ញាសឹក ដោយប្រាប់តុលាការ នៅថ្ងៃអង្គារ (ទី១១ ខែកុម្ភៈ) នេះថា ការបដិសេធរបស់គណបក្សប្រឆាំង ក្នុងការមិនទះដៃអបអរសាទររូបលោក ឬចាប់ដៃជាមួយលោក លាតត្រដាងនូវផែនការរបស់ក្រុមនេះ ដែលមានបំណង «បំផ្លាញ» រដ្ឋាភិបាលរបស់លោក។

គួររំលឹកថា អតីតរដ្ឋអាជ្ញា បានរុញឲ្យប្រទេសប្រកាន់របបប្រជាធិបតេយ្យកូរ៉េខាងត្បូងធ្លាក់ចូលក្នុងភាពចលាចលផ្នែកនយោបាយ នៅពេលដែលលោកបានប្រកាសច្បាប់អាជ្ញាសឹក កាលពីថ្ងៃទី៣ ខែធ្នូឆ្នាំមុន ដោយផ្អាកការគ្រប់គ្រងផ្នែកស៊ីវិល និងបញ្ជូនទាហានទៅរដ្ឋសភា។ ការប៉ុនប៉ងនេះមានរយៈពេលត្រឹមតែ ៦ម៉ោងប៉ុណ្ណោះ ខណៈសភាដឹកនាំដោយគណបក្សប្រឆាំង បានផ្គើននឹងកងទ័ព ហើយបោះឆ្នោតច្រានចោលសេចក្តីប្រកាសនេះ ដែលក្រោយមកបានចោទប្រកាន់ទម្លាក់តំណែងលោកប្រធានាធិបតី ជុំវិញចំណាត់ការនេះ។

លោក Yoon ត្រូវបានឃុំខ្លួនកាលពីពាក់កណ្តាលខែមករា ក្រោមការចោទប្រកាន់ពីបទបះបោរ ដោយបាននាំឲ្យលោកក្លាយជាប្រមុខរដ្ឋកូរ៉េខាងត្បូងដំបូងគេដែលត្រូវបានចាប់ខ្លួន។ លោកត្រូវបានបញ្ជូនពីពន្ធនាគារជាទៀងទាត់ទៅសវនាការ នៅតុលាការធម្មនុញ្ញ ដែលនឹងកំណត់ថា តើការចោទប្រកាន់លើរូបលោក ត្រូវបានតម្កល់ដែរ ឬយ៉ាងណា។

នៅឯសវនាការ នាថ្ងៃទី១១ ខែកុម្ភៈនេះ ដែលទំនងជាការកាត់ទោសមួយ ក្នុងចំណោមដំណើរការកាត់ក្ដីចុងក្រោយ លោក Yoon បានត្អូញត្អែរថា គណបក្សប្រឆាំងកូរ៉េខាងត្បូង មិនបានផ្តល់ការគោរពដល់រូបលោកឡើយ ក្នុងពេលដែលលោកកំពុងកាន់តំណែង។

បុរសវ័យ ៦៤ឆ្នាំ បានប្រាប់តុលាការថា៖ «មិនថាពួកគេមិនចូលចិត្តខ្ញុំកម្រិតណាក្ដី ក៏នេះគឺជាគោលការណ៍ជាមូលដ្ឋាននៃការសន្ទនា និងការសម្របសម្រួល ដើម្បីស្តាប់ខ្ញុំ និងការទះដៃអបអរដល់ខ្ញុំ សម្រាប់សុន្ទរកថាថវិការបស់ខ្ញុំ នៅក្នុងរដ្ឋសភា»។

លោកបានបន្ថែមថា ប៉ុន្តែសមាជិកសភារបស់បក្សប្រឆាំង «មិនបានសូម្បីតែចូលទៅអង្គុយក្នុងសាលធំ ហើយខ្ញុំត្រូវថ្លែងសុន្ទរកថាទៅកាន់សភាដែលមានវត្តមានសមាជិកតែពាក់កណ្តាល»។ លោកបានអះអាងថា កាយវិការបែបនេះគឺ «បង្កប់ដោយគំនិតព្យាបាទយ៉ាងខ្លាំង» ហើយលាតត្រដាងពី «ចេតនារបស់ក្រុមប្រឆាំង ដើម្បីបំផ្លាញរដ្ឋាភិបាលរបស់ខ្ញុំ»៕