ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃពុធ (ទី១២ ខែកុម្ភៈ) បានរិះគន់សំណើរបស់ប្រធានាធិបតីអាមេរិក លោក Donald Trump ដែលចង់កាន់កាប់តំបន់ហ្កាហ្សា និងផ្លាស់ប្តូរទីលំនៅរបស់ពលរដ្ឋប៉ាឡេស្ទីន ដោយលើកឡើងថា ជារឿងគួរឲ្យអស់សំណើច និងចោទប្រកាន់ទីក្រុងវ៉ាស៊ីនតោនថា កំពុងសម្លុតកំហែងអ្នកដទៃ។

ដោយមិនបានបញ្ចេញឈ្មោះលោក Trump ផ្ទាល់ ការអត្ថាធិប្បាយរបស់ទីភ្នាក់ងារសារព័ត៌មានមជ្ឈិមកូរ៉េ (KCNA) បានលើកឡើងថា ក្តីសង្ឃឹមដ៏តិចតួចរបស់ពលរដ្ឋប៉ាឡេស្ទីន ដើម្បីទទួលបានសុវត្ថិភាព និងសន្តិភាព កំពុងត្រូវបានបំផ្លាញដោយសំណើនេះ។ សារព័ត៌មាន KCNA បានបន្ថែមថា៖ «ឥឡូវនេះពិភពលោក កំពុងក្ដៅកញ្ជ្រោលដូចបាយពុះ ដោយសារការប្រកាសដ៏មិនគួរឲ្យជឿរបស់អាមេរិកនេះ»។

ការអត្ថាធិប្បាយនេះ គឺសំដៅលើការប្រកាសដ៏គួរឲ្យភ្ញាក់ផ្អើលរបស់លោក Trump ដែលថា សហរដ្ឋអាមេរិក មានបំណងយកអ្នកស្រុកហ្កាហ្សាចេញទាំងអស់ បើយប្រែក្លាយដែនដីដែលត្រូវបានបំផ្លិចបំផ្លាញដោយសង្រ្គាម ឲ្យទៅជាអ្វីដែលលោកប្រធានាធិបតី បានហៅជា «Riviera of Middle East» (តំបន់មជ្ឈិមបូព៌ាដ៏ស៊ីវិល័យ»។

ការអត្ថាធិប្បាយរបស់សារព័ត៌មាន KCNA ក៏បានរិះគន់រដ្ឋបាលលោក Trump ជុំវិញការអំពាវនាវរបស់ខ្លួនឲ្យកាន់កាប់ព្រែកជីកប៉ាណម៉ា និងដែនដី Greenland និងការសម្រេចចិត្តរបស់ខ្លួន ក្នុងការផ្លាស់ប្តូរឈ្មោះឈូងសមុទ្រម៉ិកស៊ិកទៅជា «ឈូងសមុទ្រអាមេរិក»។

សេចក្ដីរាយការណ៍របស់ប្រព័ន្ធផ្សព្វផ្សាយ KCNA បានសង្កត់ធ្ងន់ថា «សហរដ្ឋអាមេរិកគួរតែភ្ញាក់ពីភាពវង្វេងស្មារតី ហើយបញ្ឈប់ជាបន្ទាន់នូវការរំលោភលើសេចក្តីថ្លៃថ្នូរ និងអធិបតេយ្យភាពរបស់ប្រទេស និងប្រជាជនដទៃ» ខណៈហៅសហរដ្ឋអាមេរិកថា ជា «ជនសម្លុតកំហែងអ្នកដទៃ»៕