ព្រះមហាក្សត្រ Abdullah II នៃប្រទេសហ្ស៊កដានី កាលពីថ្ងៃអង្គារ បានប្រាប់លោក ដូណាល់ ត្រាំ ថា ប្រទេសរបស់ព្រះអង្គ នឹងទទួលយកកុមារដែលឈឺប្រមាណ ២.០០០នាក់ ពីតំបន់ហ្កាហ្សា ដែលហែកហួរដោយសង្រ្គាម ខណៈដែលលោកប្រធានាធិបតីអាមេរិក បានជំរុញផែនការរបស់ខ្លួន ដើម្បីដណ្តើមយកទឹកដី និងរុញច្រានជនជាតិប៉ាឡេស្ទីនចេញពីដែនដីនេះ។

ថ្លែងនៅឯសេតវិមាន ព្រះមហាក្សត្រ Abdullah បានមានបន្ទូលបន្ថែមថា អេហ្ស៊ីប នឹងបង្ហាញសំណើអំពីរបៀប ដែលប្រទេសក្នុងតំបន់ អាច «ធ្វើការ» ជាមួយលោក ត្រាំ លើផែនការនេះ បើទោះបីជាប្រទេសអារ៉ាប់ និងប៉ាឡេស្ទីន បានបដិសេធវាទាំងស្រុងក៏ដោយ។

ព្រះមហាក្សត្រ Abdullah បានថ្លែង នៅពេលលោក ត្រាំ ស្វាគមន៍ព្រះអង្គ និងព្រះអង្គម្ចាស់ Hussein នៅក្នុងការិយាល័យ Oval Office ថា៖«ខ្ញុំគិតថា រឿងមួយដែលយើងអាចធ្វើបានភ្លាមៗ គឺទទួលយកកុមារ ២.000នាក់ កុមារមានជំងឺមហារីក ដែលស្ថិតក្នុងស្ថានភាពឈឺខ្លាំង។

លោក ត្រាំ បានហៅការទទួលយកកុមារនេះថា ជា «កាយវិការដ៏ថ្លៃថ្នូរ» ហើយបាននិយាយថា លោកមិន ដឹងអំពីរឿងនេះ មុនពេលព្រះមហាក្សត្រហ្សកដានី បានមកដល់ឯសេតវិមាននោះទេ។