ក្រុមសកម្មប្រយុទ្ធហាម៉ាសប៉ាឡេស្ទីន នៅថ្ងៃព្រហស្បតិ៍ (ទី១៣ ខែកុម្ភៈ) នេះ បានប្រាប់ឲ្យដឹងថា ខ្លួនមិនចង់ឲ្យកិច្ចព្រមព្រៀងបទឈប់បាញ់នៅតំបន់ហ្កាហ្សាដួលរលំនោះឡើយ ដោយការលើកឡើងនេះកើតមាននៅមុនថ្ងៃផុតកំណត់នាថ្ងៃសៅរ៍ សម្រាប់ឲ្យក្រុមនេះដោះលែងចំណាប់ថ្នូរអ៊ីស្រាអែលបន្ថែមទៀត។

គួរបញ្ជាក់ថា នៅក្រោមកិច្ចព្រមព្រៀងនេះ ក្រុមហាម៉ាស បានយល់ព្រមដោះលែងចំណាប់ថ្នូរ ៣នាក់ទៀត នៅថ្ងៃសៅរ៍ចុងសប្ដាហ៍នេះ ប៉ុន្តែបានប្រាប់ក្នុងសប្តាហ៍នេះថា ខ្លួនកំពុងផ្អាកការប្រគល់នេះ ដោយសារអ្វីដែលខ្លួនបានចោទថា ជាការរំលោភលើលក្ខខណ្ឌពីភាគីអ៊ីស្រាអែល។

ប្រធានាធិបតីអាមេរិក លោក Donald Trump បានឆ្លើយតបដោយនិយាយថា ចំណាប់ថ្នូរទាំងអស់ ត្រូវតែមានតែមានសេរីភាពនៅវេលាថ្ងៃត្រង់ថ្ងៃសៅរ៍ បើមិនដូច្នេះទេ លោកនឹង «បណ្ដោយឲ្យទិដ្ឋភាពដូចឋាននរកកើតមានឡើង»។ ហើយនាយករដ្ឋមន្ត្រីអ៊ីស្រាអែល លោក Benjamin Netanyahu បានពោលក្ដែងៗថា ប្រទេសរបស់លោកនឹងចាប់ផ្ដើម «ការប្រយុទ្ធយ៉ាងខ្លាំងក្លា» ឡើងវិញ ប្រសិនបើក្រុមហាម៉ាសមិនបំពេញតាមកាលកំណត់នោះទេ។

អ្នកនាំពាក្យក្រុមហាម៉ាស លោក Abdel-Latif Al-Qanoua បានប្រាប់ថា៖ «យើងមិនចាប់អារម្មណ៍ពីការដួលរលំនៃកិច្ចព្រមព្រៀងឈប់បាញ់នៅតំបន់ហ្កាហ្សាស្ទ្រីបទេ ហើយយើងផ្ដោតលើការអនុវត្ត និងធានាថា ការកាន់កាប់ (អ៊ីស្រាអែល) ត្រូវប្រកាន់ខ្ជាប់តាមគ្រប់លក្ខខណ្ឌទាំងអស់»។

លោក Qanoua បាននិយាយថា៖ «ភាសាគំរាមកំហែង និងបំភិតបំភ័យ ដែលប្រើប្រាស់ដោយលោក Trump និង Netanyahu មិនជួយដល់ការអនុវត្តកិច្ចព្រមព្រៀងបទឈប់បាញ់នោះទេ»៕