នៅថ្ងៃព្រហស្បតិ៍នេះ ប្រជាពលរដ្ឋរស់នៅក្នុងតំបន់ Donetsk គ្រប់គ្រងដោយរុស្ស៊ី មានសុទិដ្ឋិនិយម ពេលដែលពួកគេចែករំលែកទស្សនៈជាមួយទីភ្នាក់ងារព័ត៌មានរ៉យទ័រ ជុំវិញការជជែកគ្នាតាមទូរស័ព្ទរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីរុស្ស៊ីលោក Vladimir Putinកាលពីរយៈពេល ១ថ្ងៃមុន ។

 លោក Putin និងលោក Trumpបានជជែកគ្នាតាមទូរស័ព្ទរយៈពេលជាង ១ម៉ោងកាលពីថ្ងៃពុធ ហើយក្រោយមក លោក Trumpនិយាយថា វាពុំស័ក្តិសមនោះទេកាលដែលអ៊ុយក្រែនមានសមាជិកភាព អង្គការណាតូនោះ គឺជាអ្វីមួយដែលទីក្រុងគីវ បានព្យាយាមស្វែងរកជាយូរមកហើយ ដើម្បីធានាដល់សន្តិសុខនាពេលអនាគតរបស់ពួកគេ ។

 លោក Trump បានជូនដំណឹងប្រធានាធិបតីអ៊ុយក្រែនលោក Volodymyr Zelenskiy ពីចំណុចសំខាន់ៗនៃការផ្លាស់ប្តូរគំនិតរបស់លោកជាមួយលោក Putin ។

 លោក Denis ដែលជាពលរដ្ឋមួយរូបរស់នៅក្នុងតំបន់ Donetsk និយាយថា កិច្ចពិភាក្សានឹងមិនអាចទៅរួចនោះទេ បើគ្មានប្រធានាធិបតីសហរដ្ឋអាមេរិក ប៉ុន្តែពួកគេនឹងមិនផ្លាស់ប្តូរអ្វីៗនោះទេ ។

 លោកបន្តថា លោក Trump ធ្លាប់ក្លាយជាប្រធានាធិបតីសហរដ្ឋអាមេរិកម្តងរួចមកហើយកាលពីអំឡុងឆ្នាំ ២០១៦-២០២០ ។ រឿងដែលខុសប្លែកគ្នាមួយគត់ គឺពួកយើងបច្ចុប្បន្នគឺជាចំណែកមួយរបស់រុស្ស៊ីទៅហើយ ។

 សូមបញ្ជាក់ថា តំបន់ Donetsk គឺជាតំបន់មួយក្នុងចំណោមតំបន់ចំនួន ៤របស់អ៊ុយក្រែនដែលរុស្ស៊ីកាន់កាប់ដោយផ្នែក ហើយនិងប្រកាសថាជារបស់ខ្លួនកាលពីឆ្នាំ ២០២២ គឺជាការប្រកាសមួយត្រូវបានចាត់ទុកថា ខុសច្បាប់ដោយប្រទេសជាច្រើននៅមហាសន្និបាតអង្គការសហប្រជាជាតិ ៕