ប្រធានាធិបតីម៉ិកស៊ិក បានចោទប្រកាន់សហរដ្ឋអាមេរិក ថាលាក់ទុកក្រុមជួញដូរគ្រឿងញៀន និងពលរដ្ឋអាមេរិកដែលធ្វើការជាមួយក្រុមឧក្រិដ្ឋកម្មនៅប្រទេសម៉ិកស៊ិក ដែលជាការរិះគន់ខ្លាំងៗបកទៅវិញ ជុំវិញការចោទប្រកាន់របស់លោក Donald Trump ថាម៉ិកស៊ិកមាន "សម្ព័ន្ធភាពដែលមិនអាចអត់អោនបាន" រវាងអ្នកជួញដូរគ្រឿងញៀន និងរដ្ឋាភិបាល។

មេដឹកនាំម៉ិកស៊ិក លោកស្រី Claudia Sheinbaum បាននិយាយនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ (១៣ កុម្ភៈ) ថា "នៅសហរដ្ឋអាមេរិកក៏មានក្រុមឧក្រិដ្ឋជនអង្គការចាត់តាំងដែរ ហើយក៏មានជនជាតិអាមេរិកដែលចូលទៅម៉ិកស៊ិកជាមួយនឹងសកម្មភាពខុសច្បាប់ទាំងនេះផងដែរ។ បើមិនដូច្នេះទេ តើបានអ្នកណាចែកចាយសារធាតុហ្វង់តានីល នៅក្នុងទីក្រុងនានារបស់អាមេរិក?"

ការអត្ថាធិប្បាយរបស់ប្រធានាធិបតីម៉ិកស៊ិករូបនេះ កើតឡើងបន្ទាប់ពីមានរបាយការណ៍មួយចេញផ្សាយកាលពីថ្ងៃចន្ទសប្ដាហ៍នេះ ដែលបង្ហាញថា ការចាប់ខ្លួនពលរដ្ឋអាមេរិកសម្រាប់បទល្មើសទាក់ទងនឹងឧក្រិដ្ឋកម្មអង្គការចាត់តាំង បានកើនឡើងជាង ៤៥០% ក្នុងអំឡុងពេលកាន់តំណែងរបស់អតីតប្រធានាធិបតីម៉ិកស៊ិក លោក Andrés Manuel López Obrador ។

លោកស្រី Sheinbaum បានអំពាវនាវឱ្យទីក្រុងវ៉ាស៊ីនតោន មិនត្រឹមតែជួយបង្រ្កាបក្រុមជួញដូរគ្រឿងញៀននៅម៉ិកស៊ិកប៉ុណ្ណោះទេ ប៉ុន្តែថែមទាំង "ឱ្យសហរដ្ឋអាមេរិកធ្វើការងារនេះនៅលើទឹកដីរបស់ខ្លួន ដើម្បីចាប់ឧក្រិដ្ឋជន ហើយបញ្ឈប់ការជួញដូរគ្រឿងញៀននៅសហរដ្ឋអាមេរិក"៕