ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍សប្ដាហ៍នេះថា លឿនពេកហើយក្នុងការនិយាយនូវអ្វីដែលនឹងកើតឡើង ស្របពេលមានកិច្ចខិតខំប្រឹងប្រែងដើម្បីបញ្ចប់សង្រ្គាមនៅអ៊ុយក្រែន ទន្ទឹមនឹងលោកZelensky និយាយថា រូបលោកចង់បានផែនការបញ្ឈប់រុស្ស៊ីជាមុនសិន មុនចាប់ផ្ដើមការចរចា។

អំឡុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីឥណ្ឌា លោក Trump បាននិយាយទៅកាន់អ្នកសារព័ត៌មាននៅឯសេតវិមានថា លឿនពេកក្នុងការនិយាយអ្វីដែលនឹងកើតឡើង ។

លោក Trump បាននិយាយថាមន្ត្រីអាមេរិក និងរុស្ស៊ី នឹងជួបប្រជុំគ្នានៅទីក្រុង Munich នៅថ្ងៃសុក្រសប្ដាហ៍នេះហើយថាអ៊ុយក្រែនក៏ត្រូវបានអញ្ជើញផងដែរ។

ទោះជាយ៉ាងណាក៏ដោយ ទីប្រឹក្សាប្រធានាធិបតីអ៊ុយក្រែន លោក Volodymyr Zelenskiy បាននិយាយថា ក្រុង Kyiv មិនរំពឹងថានឹងជួបពិភាក្សាជាមួយភាគីរុស្ស៊ីនៅក្នុងសន្និសីទសន្តិសុខប្រចាំឆ្នាំនៅទីក្រុង Munich នៅថ្ងៃសុក្រនេះទេ ហើយជឿជាក់ថា សហរដ្ឋអាមេរិក អឺរ៉ុប និងអ៊ុយក្រែន ត្រូវការជំហររួមមួយ មុនពេលពិភាក្សាជាមួយទីក្រុងមូស្គូ។

លោក Trump ក៏បានលើកឡើងទៅកាន់ក្រុមអ្នកសារព័ត៌មានផងដែរថា នឹងមានកិច្ចប្រជុំមន្ត្រីកំពូល ទោះមិនមែនជាមេដឹកនាំក៏ដោយ មកពីប្រទេសទាំងបីនៅក្នុងប្រទេសអារ៉ាប៊ីសាអ៊ូឌីតនៅសប្តាហ៍ក្រោយ ក្នុងគោលបំណងបញ្ចប់សង្រ្គាម។

ក្រសួងការបរទេសអាមេរិកបាននិយាយថា កាលពីថ្ងៃព្រហស្បតិ៍ រដ្ឋមន្ត្រីការបរទេសសហរដ្ឋអាមេរិក លោក Marco Rubio បានពិភាក្សាពីភាពចាំបាច់នៃច្រកការទូត ដើម្បីបញ្ចប់សង្រ្គាមនៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ុយក្រែន Andrii Sybiha ៕