គ្រឿងចក្រឈូសឆាយជាច្រើនគ្រឿង យានយន្តសំណង់ និងរថយន្តដឹកផ្ទះចល័ត បានតម្រង់ជួរ នៅច្រកព្រំដែន Rafah នៃប្រទេសអេហ្ស៊ីប កាលពីថ្ងៃព្រហស្បតិ៍ ដើម្បីរង់ចាំចូលទៅតំបន់ហ្កាហ្សា។

ដោយមានទំនាក់ទំនងជិតស្និទ្ធជាមួយសេវាស៊ើបការណ៍សម្ងាត់អេហ្ស៊ីប សារព័ត៌មាន Al-Qahera បានរាយការណ៍ថា គ្រឿងចក្រជាច្រើន ត្រូវបានដាក់ នៅច្រកឆ្លងកាត់នេះ ដើម្បីត្រៀមចូលទៅក្នុងទឹកដីប៉ាឡេស្ទីន ដែលបំផ្លិចបំផ្លាញដោយសង្រ្គាម។

អ្នកថតរូប AFP ក៏បានបញ្ជាក់ដែរថា បានឃើញរថយន្តទាំងនោះ រួមទាំងរថយន្តដឹកទំនិញជាច្រើនគ្រឿង ដែលកំពុងរង់ចាំ នៅព្រំដែននេះ។

ទោះបីជាយ៉ាងណាក៏ដោយ អ្នកនាំពាក្យរដ្ឋាភិបាលអ៊ីស្រាអែល បាននិយាយថា គ្រឿងចក្រធុនធ្ងន់ នឹងមិនត្រូវបានអនុញ្ញាតឲ្យចូលទៅក្នុងតំបន់ហ្កាហ្សាស្ទ្រីប តាមរយៈច្រកឆ្លងកាត់ Rafah ជាមួយអេហ្ស៊ីបនោះទេ។

លោក Omer Dostri អ្នកនាំពាក្យលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានសរសេរនៅលើគេហទំព័រ X ថា៖«មិនមានការចូលនូវរថយន្តដឹកផ្ទះចល័ត ឬគ្រឿងចក្រធុនធ្ងន់ ទៅក្នុងតំបន់ហ្កាហ្សាទេ ហើយក៏ពុំមានការសម្របសម្រួលសម្រាប់បញ្ហានេះដែរ»។

លោកបានបន្ថែមថា៖«យោងតាមកិច្ចព្រមព្រៀង គ្មានទំនិញណា ត្រូវបានអនុញ្ញាតឲ្យចូលក្នុងតំបន់ ហ្កហ្សា តាមរយៈការឆ្លងកាត់ Rafah នោះទេ»។