មន្ត្រីសហភាពអឺរ៉ុប នៅថ្ងៃពុធសប្ដាហ៍នេះ បានបង្ហាញសញ្ញាថា សហភាពអឺរ៉ុប បានត្រៀមដាក់ចេញវិធានការសងសឹកលើការដំឡើងពន្ធលោហៈដែលជិតចូលជាធរមានរបស់សហរដ្ឋអាមេរិក ប៉ុន្តែក៏សង្ឃឹមថានឹងអាចបញ្ចៀសសង្គ្រាមពាណិជ្ជកម្មដ៏បំផ្លិចបំផ្លាញដោយការចរចាទប់ស្កាត់ភាពតានតឹង។

បណ្ដារដ្ឋមន្ត្រីដែលទទួលបន្ទុកផ្នែកពាណិជ្ជកម្មមកពីសមាជិកទាំង ២៧ របស់ប្លុកនេះ បានជួបប្រជុំគ្នាក្នុងសន្និសីទវីដេអូមួយកាលពីថ្ងៃពុធ ដើម្បីពិភាក្សាពីការឆ្លើយតបរបស់សហភាពអឺរ៉ុប ចំពោះលោកប្រធានាធិបតីអាមេរិក Donald Trump ដែលបានដាក់ពន្ធបន្ថែម ២៥% លើការនាំចូលដែកថែប និងអាលុយមីញ៉ូមទាំងអស់ ចាប់ពីថ្ងៃទី១២ ខែមីនា។

ប្រធានគណៈកម្មការអឺរ៉ុប លោកស្រី Ursula von der Leyen បានហៅពន្ធថ្មីទាំងនោះថាមិនសមហេតុផល ហើយព្រមានថា អឺរ៉ុបនឹង "ជំរុញឱ្យមានការប្រឆាំងយ៉ាងរឹងមាំ និងសមាមាត្រតបតវិញ"។

មន្ត្រីរដ្ឋាភិបាលសហភាពអឺរ៉ុបម្នាក់បាននិយាយថា បណ្ដារដ្ឋមន្ត្រីបានពិភាក្សាអំពីវិធានការសងសឹកដែលមានសក្តានុពល ដូចជាការស្ដារឡើងវិញនូវពន្ធនាំចូលដែលបានដាក់ក្នុងឆ្នាំ២០១៨ លើផលិតផលសហរដ្ឋអាមេរិក រាប់ចាប់ពីស្រាវីស្គីអាមេរិក ទៅដល់ទោចក្រយានយន្ត ជាការឆ្លើយតបទៅនឹងពន្ធបន្ថែមដំបូងរបស់រដ្ឋបាលលោក Trump លើដែកថែប និងអាលុយមីញ៉ូមនេះ៕