នាយករដ្ឋមន្ត្រីហុងគ្រី លោក Viktor Orban បានប្រាប់វិទ្យុរដ្ឋ នៅថ្ងៃសុក្រនេះថា ប្រទេសរុស្ស៊ី នឹងត្រូវបាន «ធ្វើសមាហរណកម្មឡើងវិញ» ទៅក្នុងសេដ្ឋកិច្ចពិភពលោក និងប្រព័ន្ធថាមពលអឺរ៉ុប នៅពេលដែលកិច្ចព្រមព្រៀងសន្តិភាព ត្រូវបានសម្រេច ហើយសង្រ្គាមនៅអ៊ុយក្រែន ត្រូវបានបញ្ចប់។

លោក Orban ដែលជាសម្ព័ន្ធមិត្តរបស់ប្រធានាធិបតី លោក ដូណាល់ ត្រាំ បាននិយាយថា៖«ប្រសិនបើប្រធានាធិបតីអាមេរិក មកនិងបង្កើតសន្តិភាព មានកិច្ចព្រមព្រៀងមួយ ខ្ញុំគិតថា រុស្ស៊ីនឹងត្រូវបានដាក់បញ្ចូលឡើងវិញ ទៅក្នុងសេដ្ឋកិច្ចពិភពលោក ប្រព័ន្ធសន្តិសុខអឺរ៉ុប និងប្រព័ន្ធសេដ្ឋកិច្ច និងថាមពលអឺរ៉ុប ដែលនឹងផ្តល់ការជំរុញយ៉ាងខ្លាំងដល់សេដ្ឋកិច្ចហុងគ្រី»។ «យើងនឹងទទួលផលបានច្រើនជាមួយនឹងកិច្ចព្រមព្រៀងសន្តិភាព»។

លោក ត្រាំ បាននិយាយថា ទាំងប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី បានបង្ហាញពីបំណងប្រាថ្នាចង់បានសន្តិភាព នៅក្នុងការសន្ទនាតាមទូរស័ព្ទដាច់ដោយឡែក ជាមួយលោកកាលពីថ្ងៃពុធ ហើយលោកបានបញ្ជាឲ្យមន្ត្រីជាន់ខ្ពស់របស់សហរដ្ឋអាមេរិក ចាប់ផ្តើមកិច្ចពិភាក្សាស្តីពីការបញ្ចប់សង្គ្រាម នៅអ៊ុយក្រែន។

ចាប់តាំងពីរុស្ស៊ី បានលុកលុយអ៊ុយក្រែន នៅដើមឆ្នាំ ២០២២ លោក Orban បានចេញមុខរិះគន់យ៉ាងខ្លាំងចំពោះការដាក់ទណ្ឌកម្មរបស់សហភាពអឺរ៉ុបប្រឆាំងនឹងទីក្រុងមូស្គូ និងការគាំទ្រផ្នែកហិរញ្ញវត្ថុ និងយោធារបស់ប្លុកសម្រាប់អ៊ុយក្រែន។

ខណៈពេលដែលបណ្តាប្រទេសនៅអឺរ៉ុបខាងលិច បានខិតខំប្រឹងប្រែងយ៉ាងខ្លាំង ដើម្បីផ្តាច់ខ្លួនចេញពីថាមពលរបស់រុស្ស៊ី ហុងគ្រីដែលជាប់ព្រំដែន ទទួលបានឧស្ម័នពីប្រទេសរុស្ស៊ីពី ៨០ទៅ ៨៥ ភាគរយ ដោយការផ្គត់ផ្គង់ប្រេងឆៅភាគច្រើន មកពីប្រទេសរុស្ស៊ីផងដែរ។