ភាពវឹកវរបានផ្ទុះឡើងនៅក្នុងទីក្រុង ប៊ូកាវូ (Bukavu) ភាគខាងកើតសាធារណរដ្ឋប្រជាធិបតេយ្យកុងហ្គោ (DRC) ខណៈក្រុមឧទ្ទាម M23 គាំទ្រដោយប្រទេសរវ៉្វាន់ដា បានទៅដល់ជាយនានារបស់ទីក្រុង នេះ ដោយបង្កើនភាពតានតឹង និងក្ដីបារម្ភនៃជម្លោះក្នុងតំបន់។  

ក្រុមឧទ្ទាមបានរុលទៅភាគខាងត្បូងចាប់តាំងពីដណ្តើមបានក្រុង Goma កាលពីខែមុន។ កាលពីថ្ងៃសៅរ៍នេះ ឃ្លាំងរបស់កម្មវិធីស្បៀងអាហារពិភពលោក ផ្ទុកស្បៀងអាហារ ៦,៨០០ តោនត្រូវបានលួច ដែលធ្វើឲ្យស្ថានការណ៍កាន់តែធ្ងន់ធ្ងរសម្រាប់អ្នកដែលត្រូវការជំនួយ។ការបាញ់គំរាមជាបន្តបន្ទាប់ ត្រូវបានឮនៅក្នុងតំបន់ដើម្បីបំភ័យក្រុមអ្នកលួចស្បៀង។     

ខណៈក្រុមឧទ្ទាមM23 បានអះអាងថាបានចូលទៅក្នុងទីក្រុងBukavu របាយការណ៍នានា បានលើកឡើង ថាក្រុមនេះពុំទាន់បានទៅដល់កណ្តាលទីក្រុងនៅឡើយទេ។ 

ទាហានកុងហ្គោត្រូវបានគេមើលឃើញកំពុងជម្លៀសចេញដើម្បីជៀសវាងការសម្លាប់រង្គាលដូចជាការដួលរលំរបស់ក្រុង Goma ហើយទាហានបានដុតបំផ្លាញឃ្លាំងអាវុធ។

 ប្រសិនបើក្រុង Bukavu ធ្លាក់ចូលដៃក្រុមឧទ្ទាម នោះនឹងក្លាយជាការពង្រីកយ៉ាងសំខាន់នៃទឹកដីរបស់ក្រុមឧទ្ទាម M23 ដែលធ្វើឱ្យក្រុមអាជ្ញាធររបស់កុងហ្គោ ចុះខ្សោយបន្ថែមទៀតនៅក្នុងតំបន់ដែលសម្បូរទៅដោយធនធាន៕