សមាគមជាតិនិងអន្តរជាតិ មើលឃើញពីបរិយាកាសវិនិយោគនៅកម្ពុជា នឹងមាន​និន្នាការ​កើន​ឡើង​ជាបន្តបន្ទាប់ ក្រោមការខិតខំ ប្រឹងប្រែង និងការកែទម្រង់​ដ៏​មុត​ស្រួច​នានា​របស់​រាជ​រដ្ឋាភិបាល ក្នុងការទាក់ទាញអ្នកវិនិយោគ និងជាប្រទេសមានសេដ្ឋកិច្ចបើកចំហរ បានផ្តល់​ភាព​អំណោយ​ផលដល់បរិយាកាសវិនិយោគ។

លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងនៅក្នុងកិច្ចសម្ភាសន៍ជាមួយ BTV ស្តីពីអំពីរំហូរវិនិយោគនៅ កម្ពុជានេះថា សន្តិភាពបានផ្តល់នូវការអភិវឌ្ឍន៍គ្រប់យ៉ាង និងបាន​បង្កើន​ទំនុក​ចចិត្តយ៉ាងខ្លាំងលើបរិយាកាសវិនិយោគនៅកម្ពុជា ជាក់ ស្តែងនៅពេល​មាន​វិបត្តិ​ដែល​ប៉ះ​ពាល់​ជា​អវិជ្ជមាន កម្ពុជាបានត្រៀមខ្លួន និងប្រែក្លាយបញ្ហាប្រឈមនានា ទៅជាកាលានុវត្តភាព ផ្តល់ ភាពអំណោយផល លើការលើកកម្ពស់ប្រសិទ្ធភាព និងភាពប្រកួតប្រជែងសេដ្ឋកិច្ច ដើម្បី​ទាក់​ទាញ​វិនិយោគិន និងធុរកិច្ចបន្ថែម ជាពិសេសការហូរចូលមកពីតំបន់ជម្លោះពាណិជ្ជកម្ម បាន​ធ្វើ​ឱ្យ​រំហូរ​វិនិយោគនៅកម្ពុជាមានកំណើនជាបន្តបន្ទាប់។

ចំណែកលោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំនៅកម្ពុជា ក៏​មាន​ក្តី​រំពឹ​ង​ខ្ពស់ ចំពោះការហូរចូល វិនិយោគិនពីបរទេសមកកម្ពុជាផងដែរ ជាក់ស្តែងនៅដើមឆ្នាំ២០២៥ នេះ ធុរជន និងវិនិយោគិនថៃ បានហូរចូលមកកម្ពុជាជាច្រើន ដើម្បី​មក​សិក្សា​លទ្ធ​ភាព​អំពី​ការ​ធ្វើ​ពាណិជ្ជកម្ម និងការវិនិយោគផ្សេងៗ ខណៈដែលក្រុមហ៊ុនដែលកំពុងធ្វើអាជីវកម្មនៅកម្ពុជាមួយ ចំនួន ក៏មានផែនការពង្រីកអាជីវកម្មបន្ថែមផងដែរ ដែលទាំង​នេះ​សុទ្ធ​តែ​ជា​ការ​ចូល​រួម​ចំណែក​គាំទ្រសកម្មភាពវិនិយោគ។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើក​ឡើង​ថា ជុំវិញឱកាសវិនិយោគ នេះ រាជរដ្ឋាភិបាលកម្ពុជាបានខិតខំប្រឹងប្រែងយ៉ាងខ្លាំង ដើម្បី​ទាក់​ទាញ​អ្នកវិនិយោគដូចជា ដើរគោះទ្វារនៅតាមបណ្តាប្រទេសមួយ ចំនួន ការទាក់ម៉ូយ និង​ការកែ​ទម្រង់ដ៏មុតស្រួចនានារបស់រាជរដ្ឋាភិបាលជាដើម គឺមាន​គោល​បំណង​រក​ការ​ងារ​ថ្មី​ៗ​ជូន​ប្រជាពលរដ្ឋ ជាពិសេសការឈានទៅសម្រេចបានតាមចក្ខុវិស័យរបស់កម្ពុជានៅឆ្នាំ២០៥០។

សូមបញ្ជាក់ថា នៅក្នុងឆ្នាំ២០២៤ កន្លងមកនេះ ក្រុមប្រឹក្សាអភិវឌ្ឍន៍កម្ពុជា បានអនុម័ត​គម្រោង​វិនិយោគ​សរុបមានចំនួន ៤១៤ គម្រោង ក្នុងនោះគម្រោងវិនិយោគថ្មីចំនួន ៣៨៧ គម្រោង និង​គម្រោង​ពង្រីកផលិតកម្មចំនួន ២៧ គម្រោង មានទុនវិនិយោគសរុប ប្រមាណ៦,៩ ពាន់លាន​ដុល្លារ​អាមេរិក និងអាចបង្កើតការងារបានប្រមាណជិត៣២ ម៉ឺនកន្លែង។ ចំណែកនៅក្នុងខែមករា ឆ្នាំ២០២៥ នេះ CDC បានអនុម័តគម្រោងវិនិយោគក្នុងសរុបចំនួន ៦៨ គម្រោង មាន​ទុន​វិនិយោគ​ប្រមាណ ៧៤៨ លានដុល្លារអាមេរិក ក្នុងនោះ គម្រោងវិនិយោគថ្មីមានចំនួន ៦៤ គម្រោង និងគម្រោងពង្រីកផលិតកម្មចំនួន ៤ គម្រោង៕ អត្ថបទ៖ សុន រ៉ាឌី