ភ្នំពេញ៖ មន្ត្រីជាន់ខ្ពស់នៃក្រសួងកសិកម្មរុក្ខា ប្រមាញ់ និងនេសាទ បានឲ្យដឹងថា ការចចារក្នុងការរៀបចំឯកសារ ក៏ដូចជាបច្ចេកទេសដើម្បីនាំផ្លែមៀនប៉ៃលិនចេញទៅប្រទេសចិន បានកំពុងមានវឌ្ឍនភាពការងារទៅមុខល្អប្រសើរ ហើយសង្ឃឹមថានៅឆ្នាំ២០២២ខាងមុខនេះ នឹងអាចចុះហត្ថលេខា លើពិធីសារអនាម័យ និងភូតគាមអនាម័យ(SPS)ជាមួយភាគីចិន។
មានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី១៦ វិច្ឆិកា ឆ្នាំ២០២១នេះ ឯកឧត្តម កែវ មុនី្នវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យ នៃក្រសួងកសិកម្មរុក្ខា ប្រមាញ់ និងនេសាទ បានលើកឡើងថា មកដល់ពេលនេះ ផ្លែមៀនប៉ៃលិន ជាមុខដំណាំទី៦ហើយបន្ទាប់ពីអង្ករ ចេក ស្វាយ ជំនិតដំឡូងមី និងពោត ដែលកម្ពុជាកំពុងចចារជាមួយភាគីចិនក្នុងការនាំចេញ។ កម្ពុជា កំពុងត្រៀមឯកសារបច្ចេកទេសពាក់ព័ន្ធលើមុខដំណាំផ្សេងៗទៀត ដូចជាម្រេច ដូង ទុរេន និងស្រកានាគជាដើម ដើម្បីត្រៀមបន្ទាប់ពីមៀនប៉ៃលិននេះ។
ឯកឧត្ដម បានបញ្ជាក់ថា កម្ពុជា ចង់ជំរុញបើកនីតិវិធីម្តងលើមុខទំនិញ និងផលិតផលកសិកម្មឲ្យបាន ២-៣មុខដំណាំ ឬជាកញ្ចប់ ប៉ុន្តែ ភាគីចិនស្នើសុំឲ្យអនុវត្តម្តងមួយមុខដំណាំ ដែលនេះជាការអនុលោមតាមច្បាប់របស់ភាគីចិន ដែលមុននឹងបើកច្រកទីផ្សារនាំចូល តម្រូវឲ្យមានការឯកភាពគ្នាអំពីទិដ្ឋភាពបច្ចេកទេស និយាយជារួម គឺអំពីលក្ខខណ្ឌតម្រូវភូតគាមអនាម័យសម្រាប់ការនាំចូលផលិតផលនីមួយៗ ត្រូវចចារជាមុន។
ឯកឧត្ដម បានបន្ថែមថា សម្រាប់កម្ពុជា ចម្ការដែលអាចនាំចេញមៀនទៅប្រទេសចិនបាន ត្រូវតែជាកសិដ្ឋានដែលចុះបញ្ជីការអនុវត្តកសិកម្មល្អ ទើបអនុញ្ញាតបាន។
សូមបញ្ជាក់ថា ស្តង់ដារអនាម័យ និងភូតគាមអនាម័យ គឺការពារការរីករាលដាលនៃជំងឺពីប្រទេសមួយទៅប្រទេសមួយ។
កិច្ចព្រមព្រៀងរបស់អង្គការពាណិជ្ជកម្មពិភពលោក (WTO)បានចែងថា អនាម័យ និងភូតគាមអនាម័យ ត្រូវស្របនឹងលក្ខខណ្ឌជាក់លាក់រួមទាំងសុវត្ថិភាពចំណីអាហារសម្រាប់សុខភាពមនុស្ស និងសត្វ ព្រមទាំងប្រព័ន្ធអេកូឡូស៊ី។ ដំណាំមិនគួរមានសំណល់ថ្នាំកសិកម្មទេ ឬសារធាតុគីមីបំពុលជីវសាស្ត្រ រួមទាំងសត្វល្អិតផងដែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
