វិមានក្រឹមឡាំង នៅថ្ងៃអង្គារ (ទី១៨ ខែកុម្ភៈ) នេះ បានប្រាប់ឲ្យដឹងថា ប្រធានាធិបតីរុស្ស៊ី លោក Vladimir Putin បានយកចិត្តទុកដាក់យ៉ាងខ្លាំងពីការចរចារកដំណោះស្រាយ ដើម្បីបញ្ចប់សង្រ្គាម នៅអ៊ុយក្រែន ខណៈដែលការពិភាក្សាកម្រិតខ្ពស់ បានចាប់ផ្តើម នៅប្រទេសអារ៉ាប៊ីសាអ៊ូឌីត ហើយថា រុស្ស៊ីចង់សម្រេចបាននូវគោលបំណងទាំងអស់ដោយសន្តិវិធី។

គួររំលឹកថា លោក Putin បានបញ្ជូនកងទ័ពរុស្ស៊ីចូលទៅក្នុងដែនដីអ៊ុយក្រែន កាលពីឆ្នាំ២០២២។ លោកបានលើកឡើងម្តងហើយម្តងទៀតថា លោកត្រៀមរួចជាស្រេច ដើម្បីពិភាក្សាអំពីការបញ្ចប់សង្រ្គាមដែលឆ្លុះបញ្ចាំងពីការពិត នៅលើដែនដី ដែលការវាយរុលទៅមុខរបស់កងកម្លាំងរុស្ស៊ី ឥឡូវនេះ គ្រប់គ្រងជិត ១ភាគ៥ នៃដែនដីរបស់អ៊ុយក្រែន។

ចារកម្មលោកខាងលិច មេដឹកនាំអឺរ៉ុប និងអតីតប្រធានាធិបតីអាមេរិក លោក Joe Biden បានអះអាងដដែលៗថា ពួកគេមិនគិតថា លោក Putin ពិតជាចង់បានសន្តិភាពនោះឡើយ ទោះបីជាប្រធានាធិបតីអាមេរិក លោក Donald Trump និយាយថា លោកគិតថា មេដឹកនាំរុស្ស៊ី មានភាពច្បាស់លាស់ក៏ដោយ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «លោកប្រធានាធិបតី Putin បាន និងកំពុងអះអាងឡើងវិញនូវពាក្យសម្ដីរបស់លោក អំពីការត្រៀមខ្លួន សម្រាប់កិច្ចចរចាសន្តិភាពតាំងតែពីដំបូងមក។ រឿងសំខាន់សម្រាប់ពួកយើង គឺការសម្រេចគោលដៅរបស់យើង។ ហើយជាការពិតណាស់ យើងពេញចិត្តមធ្យោបាយសន្តិវិធី ដើម្បីសម្រេចបានគោលដៅរបស់យើង»។

តែយ៉ាងណាក្ដី លោក Peskov បានប្រាប់ថា មិនទាន់មានការដឹងច្បាស់លាស់ អំពីកាលបរិច្ឆេទ សម្រាប់ជំនួប រវាងលោក Putin និងលោក Trump នៅឡើយទេ ទោះបីជាកិច្ចពិភាក្សា នៅទីក្រុងរីយ៉ាដ អាចនាំមកនូវភាពប្រាកដប្រជាក៏ដោយ។ លោកបានបញ្ជាក់ថា វាគឺមិនអាចផ្តល់នូវភាពច្បាស់លាស់ណាមួយនៃការចរចាបាននោះទេ ខណៈគ្រប់យ៉ាងទើបតែបានចាប់ផ្តើម៕