រដ្ឋបាលរបស់លោកប្រធានាធិបតីអាមេរិក Donald Trump បាននិយាយកាលពីថ្ងៃអង្គារ (១៨ កុម្ភៈ) ថា ខ្លួនបានយល់ព្រមរៀបចំកិច្ចពិភាក្សាបន្ថែមទៀតជាមួយភាគីរុស្ស៊ី ស្ដីពីការបញ្ចប់សង្រ្គាមនៅអ៊ុយក្រែន បន្ទាប់ពីកិច្ចប្រជុំដំបូងដែលពុំមានរួមបញ្ចូលទីក្រុងគីវ ដោយខុសឆ្ងាយខ្លាំងពីវិធីសាស្ត្រមុនៗរបស់ទីក្រុងវ៉ាស៊ីនតោន ដែលបានប្រមូលផ្តុំសម្ព័ន្ធមិត្តអាមេរិក ក្នុងបំណងឱ្យលោកប្រធានាធិបតីរុស្ស៊ី Vladimir Putin ឯកោ។

ខណៈដែលកិច្ចប្រជុំរយៈពេល ៤ម៉ោងកន្លះក្នុងរដ្ឋធានីអារ៉ាប៊ីសាអ៊ូឌីត ដំណើរការទៅមុខ រុស្ស៊ីបានពង្រឹងការទាមទាររបស់ខ្លួន ជាពិសេសដោយទទូចថា ខ្លួននឹងមិនអត់ឱនចំពោះសម្ព័ន្ធមិត្តណាតូ ដែលផ្តល់សមាជិកភាពដល់អ៊ុយក្រែនឡើយ។

កិច្ចពិភាក្សានៅទីក្រុងរីយ៉ាដ គឺជាលើកទីមួយហើយដែលមន្ត្រីអាមេរិក និងរុស្ស៊ីបានជួបប្រជុំគ្នា ដើម្បីពិភាក្សាពីវិធីបញ្ឈប់ជម្លោះដ៏បង្ហូរឈាមបំផុតនៅអឺរ៉ុប ចាប់តាំងពីសង្គ្រាមលោកលើកទីពីរមក។ អ៊ុយក្រែន និយាយថាខ្លួននឹងមិនទទួលយកកិច្ចព្រមព្រៀងណាមួយដែលធ្វើឡើងដោយពុំមានការយល់ព្រមពីខ្លួនឡើយ ហើយអធិការបតីអាល្លឺម៉ង់ លោក Olaf Scholz បានបញ្ជាក់ជាថ្មីថា "មិនត្រូវមានការសម្រេចចិត្តណាមួយរំលងអ៊ុយក្រែនទេ"។

រដ្ឋមន្ត្រីការបរទេសអាមេរិក លោក Marco Rubio បានលើកឡើងថា ក្រុមកម្រិតខ្ពស់នឹងចាប់ផ្តើមកិច្ចពិភាក្សាស្តីពីការបញ្ចប់ជម្លោះ ហើយនឹងធ្វើការដោយឡែកពីគ្នា ដើម្បីស្តារឡើងវិញនូវបេសកកម្មការទូតរបស់ប្រទេសរៀងៗខ្លួននៅក្នុងទីក្រុងវ៉ាស៊ីនតោន និងទីក្រុងមូស្គូ ដើម្បីសម្រួលដល់កិច្ចពិភាក្សានាពេលខាងមុខ៕