របាយការណ៍ពីស្ថាប័នកាតក្រេឌីត CreditCards បានបង្ហាញកាលពីថ្ងៃអង្គារ (១៨ កុម្ភៈ) ថា ពលរដ្ឋនៅសហរដ្ឋអាមេរិក ម្នាក់ក្នុងចំណោម ៥នាក់និយាយថា ពួកគេកំពុងរួសរាន់ទិញទំនិញច្រើនជាងពេលធម្មតា ជាចម្បងដោយសារតែក្ដីបារម្ភលើការដំឡើងពន្ធរបស់លោកប្រធានាធិបតី Donald Trump ដោយឆ្លុះបញ្ចាំងពីកំណើនក្ដីកង្វល់របស់អតិថិជនចំពោះលទ្ធភាពនៃការឡើងថ្លៃទំនិញ និងភាពមិនប្រាកដប្រជាខាងសេដ្ឋកិច្ច។

ការដំឡើងពន្ធអាចក្លាយជាអតិផរណា ព្រោះជំហាននេះបង្កើនថ្លៃដើមនៃទំនិញនាំចូល ដែលជំរុញឱ្យអាជីវកម្មត្រូវចំណាយខ្ពស់ ហើយអាចបញ្ជូនផលប៉ះពាល់នេះទៅឱ្យអ្នកប្រើប្រាស់តាមរយៈការឡើងថ្លៃទំនិញ។ ការណ៍នេះអាចនាំឱ្យមានសម្ពាធអតិផរណាកាន់តែទូលំទូលាយ ដោយសារតម្លៃផលិតកម្មកើនឡើងនៅទូទាំងឧស្សាហកម្មដែលពឹងផ្អែកលើវត្ថុធាតុដើម និងសមាសធាតុបរទេស។

សម្រាប់អ្នកប្រើប្រាស់ ភាពភ័យខ្លាចនៃការកើនឡើងតម្លៃទំនិញ តែងតែជំរុញឱ្យមានឥរិយាបទស្តុកទុកឥវ៉ាន់ ជាពិសេសស្បៀងអាហារក្រៀម ក្រដាសអនាម័យ និងសម្ភារៈវេជ្ជសាស្រ្ត ដោយសារពួកគេប្រញាប់ប្រញាល់ទិញទំនិញឱ្យបានច្រើន មុនពេលតម្លៃកើនឡើងបន្ថែមទៀត។

របាយការណ៍បង្ហាញថា នៅពេលត្រូវសាកសួរពីផលប៉ះពាល់នៃការដំឡើងពន្ធដែលបានគ្រោងទុករបស់លោក Trump លើការបញ្ជាទិញខ្នាតធំ អ្នកឆ្លើយសំណួរ ២២% និយាយថា ពួកគេរងផលប៉ះពាល់យ៉ាងខ្លាំង ខណៈតួលេខ ៣០% រាយការណ៍ពីផលប៉ះពាល់មួយចំនួន៕