រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយកាលពីថ្ងៃអង្គារ ទី១៨ ខែកុម្ភៈថា ទីក្រុងមូស្គូនឹងមិនទទួលយកការដាក់ពង្រាយកងទ័ពសម្ព័ន្ធយោធាណាតូឡើយ ដោយមិនគិតពីទង់ជាតិប្រទេសដែលពួកគេកំពុងធ្វើប្រតិបត្តិការ នោះទេ។ លោក Lavrov បាននិយាយដូច្នេះ មួយថ្ងៃបន្ទាប់ពីមេដឹកនាំសហភាពអ៊ឺរ៉ុប បានបើកកិច្ចចរចាបន្ទាន់កាលពីថ្ងៃចន្ទ ទី១៧ ខែកុម្ភៈ ដោយអំពាវនាវឱ្យមានការចំណាយខ្ពស់ដើម្បីបង្កើនសមត្ថភាពការពារជាតិរបស់ទ្វីបនេះ ខណៈកំពុងខ្វែងគំនិតគ្នាពីការដាក់ពង្រាយកងរក្សាសន្តិភាពទៅកាន់ប្រទេសអ៊ុយក្រែន។

ចក្រភពអង់គ្លេស ស៊ុយអែត និងប្រទេសអាល្លឺម៉ង់ បាននិយាយថា ពួកគេបើកចំហក្នុងការបញ្ជូនកងរក្សាសន្តិភាពទៅប្រទេសអ៊ុយក្រែន ដោយផ្តល់អាណត្តិច្បាស់លាស់ និងអាចទទួលយកបាន។ មន្ត្រីជាច្រើនបានសង្កត់ធ្ងន់ថា ពួកគេនឹងពិចារណាការបញ្ជូនទាហានទៅកាន់ប្រទេសអ៊ុយក្រែន ប្រសិនបើសហរដ្ឋអាមេរិក ផ្តល់ការធានាសន្តិសុខ។ នាយករដ្ឋមន្ត្រីអង់គ្លេស លោក Keir Starmer បាននិយាយនៅមុនកិច្ចប្រជុំថា លោកមានឆន្ទៈក្នុងការបញ្ជូនកងរក្សាសន្តិភាព ប៉ុន្តែត្រូវមានការធានាសន្តិសុខរបស់អាមេរិក។

ប្រទេសអាល្លឺម៉ង់ បានឲ្យដឹងថា ការពិភាក្សានានាអំពីការដាក់ពង្រាយកងទ័ពអឺរ៉ុប គឺលឿនពេក។ ប្រទេសដាណឺម៉ាក និយាយថា ខ្លួនបើកចិត្តទូលាយអំពីការគាំទ្រកងកម្លាំងរក្សាសន្តិភាពនៅក្នុងប្រទេសអ៊ុយក្រែន។

នាយករដ្ឋមន្ត្រីស៊ុយអែត លោក Ulf Kristersson បាននិយាយថា ប្រទេសរបស់លោកនឹងពិចារណាក្នុងការរួមចំណែកដល់កងកម្លាំងរក្សាសន្តិភាពក្រោយសង្គ្រាមនៅក្នុងប្រទេសអ៊ុយក្រែន ប៉ុន្តែការចរចានឹងត្រូវដំណើរការ មុនពេលការសម្រេចចិត្តបែបនេះត្រូវបានធ្វើឡើង។