មនុស្សជាច្រើននៅក្នុងតំបន់ហ្កាហ្សាស្ទ្រីប នៅតែរស់នៅក្នុងជំរំតង់ ឬលំនៅឋានបណ្តោះអាសន្នផ្សេងទៀតជាច្រើនសប្តាហ៍ បន្ទាប់ពីបទឈប់បាញ់រវាងអ៊ីស្រាអែល និងក្រុមហាម៉ាស បានចូលជាធរមាន កាលពីខែមុន។

កង្វះស្បៀងអាហារធ្ងន់ធ្ងរកំពុងធូរស្រាលបន្តិចម្ដងៗនៅតំបន់ហ្កាហ្សា ខណៈការដឹកជញ្ជូនជំនួយមនុស្សធម៌មានការកើនឡើង។ អាជ្ញាធរអ៊ីស្រាអែល បាននិយាយថា រថយន្តដឹកជំនួយប្រហែល ១៧.០០០គ្រឿង បានចូលទៅក្នុងតំបន់ហ៊ុមព័ទ្ធនេះកាលពីថ្ងៃសៅរ៍សប្តាហ៍មុន បន្ទាប់ពីអំឡុងពេលបទឈប់បាញ់រយៈពេល៦សប្តាហ៍ បានចាប់ផ្តើមនៅថ្ងៃទី ១៩ ខែមករា។

ទន្ទឹមនឹងនេះ ក្រុមហាម៉ាស បានចោទប្រកាន់អ៊ីស្រាអែលថា បានរំលោភលើកិច្ចព្រមព្រៀងបទឈប់បាញ់ ដោយមិនអនុញ្ញាតឱ្យមានការដឹកជញ្ជូនទីជម្រកបណ្តោះអាសន្នសម្រាប់ពលរដ្ឋ និងគ្រឿងចក្រធុនធ្ងន់សម្រាប់សំណង់។ អង្គការសហប្រជាជាតិ បាននិយាយថា ៩២ភាគរយនៃលំនៅឋាននៅក្នុងតំបន់ហ្កាហ្សា បានខូចខាត ឬត្រូវបានបំផ្លាញ ដោយសារតែការប្រយុទ្ធគ្នារវាងក្រុមហាម៉ាស និងអ៊ីស្រាអែល។

លោក Habil ស្នាក់នៅជាមួយប្រពន្ធ និងកូនស្រីពីរនាក់ នៅក្នុងតង់ដែលពួកគេបានបង្កើតឡើងនៅជាយក្រុងនៃតំបន់លំនៅឋានមួយកន្លែង។ លោកបាននិយាយថា ពេលខ្យល់បក់ខ្លាំង គាត់ភ័យខ្លាចថា តង់ អាចនឹងត្រូវវាយបោកបក់ទៅតាមខ្យល់ ហើយលោកបានអោបកូនស្រីរបស់លោក ក្នុងដៃ។

លោកនិយាយថា លោកត្រូវការកន្លែងមួយដើម្បីការពារកូនៗពីភាពត្រជាក់ដែលពួកគាត់កំពុងឆ្លងកាត់នៅពេលនេះ ហើយក៏ត្រូវការគ្រឿងចក្រឈូសឆាយ ដើម្បីសម្អាតកម្ទេចកម្ទី ដូច្នេះលោកអាចត្រឡប់ទៅលំនៅឋានវិញ។