ដោយប្រឈមនឹងការទាមទាររបស់សហរដ្ឋអាមេរិក ក្នុងការផ្តល់សាច់ដុំយោធាដើម្បីអនុវត្តកិច្ចព្រមព្រៀងសន្តិភាពអ៊ុយក្រែនពេលអនាគត អឺរ៉ុបមើលឃើញថាខ្លួនកំពុងស្ថិតនៅក្នុងចំណុចដ៏លំបាកមួយ។ ក្រុមអ្នកជំនាញនិយាយថា ការបញ្ជូនកងរក្សាសន្តិភាពអឺរ៉ុបទៅអ៊ុយក្រែន អាចបន្ថយ និងធ្វើឱ្យចុះខ្សោយកម្លាំងការពាររបស់សម្ព័ន្ធយោធាណាតូ ហើយថា បេសកកម្មនោះអាចនឹងនៅតែត្រូវការការគាំទ្ររបស់អាមេរិក។

ខណៈកងកម្លាំងប្រចាំការរបស់ទីក្រុងវ៉ាស៊ីនតោន ប្រហែលជាមិនចាំបាច់ ការរារាំងក្នុងទម្រង់ជាមីស៊ីលរយៈចម្ងាយមធ្យមរបស់អាមេរិក និងនៅទីបំផុតអាវុធនុយក្លេអ៊ែរ នឹងនៅតែមានសារៈសំខាន់។ លោក Mark Lyall Grant ទីប្រឹក្សាសន្តិសុខជាតិរបស់ចក្រភពអង់គ្លេស បានលើកឡើងថា "មានការសង្ស័យខ្លាំងលើការធានាសុវត្ថិភាពដែលអាចជឿទុកចិត្តបាន ១០០% លុះត្រាតែរឿងនោះពាក់ព័ន្ធនឹងភាគីអាមេរិកតាមមធ្យោបាយណាមួយ"។

ក្រុមមន្ត្រីអឺរ៉ុបក៏និយាយដែរថា មានតែការធានារបស់អាមេរិកទេដែលនឹងការពារកងរក្សាសន្តិភាពអឺរ៉ុប និងទប់ស្កាត់រុស្ស៊ី មិនឱ្យវាយប្រហារណាមួយលើអ៊ុយក្រែន នាពេលអនាគត។

កាលពីសប្តាហ៍មុន ប្រធានាធិបតីអាមេរិក លោក Donald Trump បានធ្វើឱ្យអឺរ៉ុបភ្ញាក់ផ្អើល ដោយការរៀបចំកិច្ចចរចាសន្តិភាពទ្វេភាគីជាមួយរុស្ស៊ី ដែលបានចាប់ផ្តើមនៅថ្ងៃអង្គារសប្ដាហ៍នេះក្នុងទីក្រុងរីយ៉ាដ ខណៈរដ្ឋមន្ត្រីការពារជាតិអាមេរិក លោក Pete Hegseth បានប្រាប់សម្ព័ន្ធមិត្តថា "ការធានាសន្តិសុខណាមួយត្រូវតែត្រូវគាំទ្រដោយអ្នកមានសមត្ថភាពនៅអឺរ៉ុប និងមិនមែនជាទាហានអឺរ៉ុបនោះទេ"៕