ប្រមុខចារកម្មរបស់ប្រទេសអូស្ត្រាលី នៅថ្ងៃពុធ (ទី១៩ ខែកុម្ភៈ) បានប្រាប់ឲ្យដឹងថា យោធារបស់ប្រទេសអូស្ត្រាលី កំពុងត្រូវបានកំណត់គោលដៅដោយទីភ្នាក់ងារស៊ើបការណ៍សម្ងាត់បរទេស ពាក់ព័ន្ធនឹងភាពជាដៃគូនាវាមុជទឹកដើរដោយថាមពលនុយក្លេអ៊ែរនៃសម្ព័ន្ធ AUKUS របស់ខ្លួន ជាមួយសហរដ្ឋអាមេរិក និងចក្រភពអង់គ្លេស ហើយប្រឈមជាមួយការគំរាមកំហែងផ្នែកចារកម្ម និងអំពើវិឆ្ឆេទកម្មដែលកំពុងកើនឡើងជាលំដាប់។

ដោយព្រមានអំពីទិដ្ឋភាពសន្តិសុខជាតិដែលកាន់តែអាក្រក់ទៅៗ អគ្គនាយកសន្តិសុខ លោក Mike Burgess បាននិយាយថា អង្គការស៊ើបការណ៍សន្តិសុខអូស្ត្រាលី (ASIO) បានកំណត់អត្តសញ្ញាណទីភ្នាក់ងារបរទេសជាច្រើន ក្នុងនោះរួមទាំងទីភ្នាក់ងារបរទេសដែលមានទំនាក់ទំនងយ៉ាងល្អជាមួយអូស្ត្រាលីផងដែរ ដែលកំពុងកំណត់គោលដៅលើសម្ព័ន្ធ AUKUS ដើម្បីកំណត់ពីសមត្ថភាពរបស់សម្ព័ន្ធនេះ ស្វែងយល់ពីរបៀបដែលអូស្ត្រាលីមានបំណងប្រើប្រាស់នាវាមុជទឹក និងធ្វើឲ្យប៉ះពាល់ដល់ទំនុកចិត្តរបស់សម្ព័ន្ធនេះ។

ក្នុងសុន្ទរកថាវាយតម្លៃការគំរាមកំហែងប្រចាំឆ្នាំ នៅឯទីស្នាក់ការកណ្តាល ASIO លោក Burgess បាននិយាយថា៖ «ប្រទេសជាច្រើនកំពុងស្វែងរកព័ត៌មាន អំពីសមត្ថភាពយោធារបស់យើង ដោយឥតឈប់ឈរ។ បុគ្គលិកការពារជាតិកំពុងត្រូវបានកំណត់គោលដៅដោយផ្ទាល់ និងតាមប្រព័ន្ធអ៊ីនធឺណិត»។

ដោយមិនបញ្ចេញឈ្មោះប្រទេសដែលមានពាក់ព័ន្ធ លោកបានបន្ថែមថា៖ «ថ្មីៗ ទីភ្នាក់ងារមួយចំនួនត្រូវបានផ្តល់អំណោយដោយសមភាគីអន្តរជាតិ។ អំណោយទាំងនោះ មានឧបករណ៍ឃ្លាំមើលជាសម្ងាត់»។

ASIO ប៉ាន់ស្មានថា កិច្ចប្រឹងប្រែងជ្រៀតជ្រែកពីបរទេស នឹងព្យាយាមធ្វើឲ្យខូចដល់ការគាំទ្រ សម្រាប់សម្ព័ន្ធ AUKUS និងចូលរួមក្នុងលទ្ធភាពនៃការធ្វើអំពើវិឆ្ឆេទកម្ម ប្រសិនបើភាពតានតឹងក្នុងតំបន់ កើនឡើងឥតថមថយ៕