យោងតាមការវាយតម្លៃថ្មីរបស់អង្គការសហប្រជាជាតិ សហភាពអឺរ៉ុប និងធនាគារពិភពលោក បានឱ្យដឹងថា កិច្ចខិតខំប្រឹងប្រែងកសាងឡើងវិញនៅតំបន់ហ្កាហ្សា នឹងត្រូវការទឹកប្រាក់ជាង ៥០ពាន់លានដុល្លារ បន្ទាប់ពីរយៈពេលជាង ១៥ខែនៃសង្គ្រាមដ៏បំផ្លិចបំផ្លាញរបស់អ៊ីស្រាអែល។

តួលេខនេះដាក់ចេញឡើងនៅពេលដែលបណ្តាប្រទេសអារ៉ាប់ បន្តជួបការលំបាកក្នុងការស្វះស្វែងរកផែនការស្តារឡើងវិញដ៏ល្អមួយ ជំនួសឱ្យការផ្លាស់ទីលំនៅដ៏ធំនៃប្រជាជនប៉ាឡេស្ទីនចំនួន ២លាននាក់ ដែលបានស្នើឡើងដោយប្រធានាធិបតីសហរដ្ឋអាមេរិក លោក Donald Trump។

ទីភ្នាក់ងារការវាយតម្លៃការខូចខាត និងតម្រូវការរបស់ដែនដីហ្កាហ្សា និងតំបន់កាន់កាប់វេសបែង ហៅកាត់ថា IRDNA បានចេញរបាយការណ៍មួយកាលពីថ្ងៃអង្គារ (១៨ កុម្ភៈ) ដោយគណនាថា សង្រ្គាមរបស់អ៊ីស្រាអែល លើតំបន់ហ្កាហ្សា បានបណ្តាលឱ្យមានការបំផ្លិចបំផ្លាញតម្លៃ ៤៩ពាន់លានដុល្លារ ចន្លោះពីថ្ងៃទី០៨ ខែតុលា ឆ្នាំ២០២៣ ដល់ថ្ងៃទី០៨ ខែតុលា ឆ្នាំ២០២៤។

អ្នកស្រាវជ្រាវបានសន្និដ្ឋានថា ឥឡូវនេះ ទឹកប្រាក់ ៥៣,២ពាន់លានដុល្លារ ជាតួលេខត្រូវការសម្រាប់ការស្តារ និងកសាងឡើងវិញចំពោះទឹកដីប៉ាឡេស្ទីននេះក្នុងរយៈពេល ១០ឆ្នាំខាងមុខ ជាមួយនឹងទឹកប្រាក់សរុបប្រហែល ២០ពាន់លានដុល្លារ ត្រូវការក្នុងរយៈពេល ៣ឆ្នាំដំបូងនៃប្រតិបត្តិការនេះ៕