ប្រធានាធិបតីអាមេរិក លោក Donald Trump បានប្រាប់អ្នកយកព័ត៌មានកាលពីថ្ងៃពុធ (១៩ កុម្ភៈ) ថា លោកកំពុងពិភាក្សាជាមួយប្រទេសចិន អំពីកម្មវិធីវីដេអូខ្លី TikTok ខណៈសហរដ្ឋអាមេរិក កំពុងស្វះស្វែងសម្របសម្រួលការលក់កម្មវិធីបណ្ដាញសង្គមដ៏ពេញនិយមមួយនេះ។

TikTok បានបង្ហាញខ្លួនឡើងវិញនៅលើប្រព័ន្ធទាញយកកម្មវិធី App Store របស់បណ្ដាញ Apple និង Google នៅសហរដ្ឋអាមេរិក កាលពីថ្ងៃព្រហស្បតិ៍សប្ដាហ៍មុន ខណៈលោក Trump បានពន្យារពេលការហាមឃាត់រហូតដល់ថ្ងៃទី០៥ ខែមេសា ហើយបានធានាក្រុមហ៊ុននានាថា ពួកគេនឹងមិនត្រូវបានពិន័យសម្រាប់ការចែកចាយ ឬថែទាំកម្មវិធីរបស់ចិនមួយនេះទេ។

កម្មវិធីដ៏ពេញនិយម ដែលមានអ្នកប្រើប្រាស់អាមេរិកចំនួន ១៧០លាននាក់នេះ បានចាប់ផ្តើមស្ដារសេវាកម្មរបស់ខ្លួនជាថ្មីឡើងវិញ ប៉ុន្មានសប្តាហ៍បន្ទាប់ពីអេបបានបិទដំណើរការរយៈពេលពេលខ្លី ខណៈលោក Trump ធានាថានឹងស្តារការចូលប្រើប្រាស់ឡើងវិញមុនការឡើងកាន់តំណែងរបស់ខ្លួន។

ក្រឹត្យរបស់លោក Trump កាលពីខែមុន បានពន្យារពេលបម្រាម TikTok រយៈពេល ៧៥ថ្ងៃ ដោយអនុញ្ញាតឱ្យក្រុមហ៊ុន ByteDance របស់ចិន បន្តប្រតិបត្តិការរបស់ខ្លួននៅក្នុងសហរដ្ឋអាមេរិក ជាបណ្តោះអាសន្ន៕