ជំងឺគ្រុនផ្តាសាយធំ កំពុងយកឈ្នះលើកូវីដ១៩ ក្លាយជាមេរោគដែលសម្លាប់មនុស្សច្រើនបំផុតនៅសហរដ្ឋអាមេរិក ក្នុងរដូវរងារនេះ ដោយជាលើកទីមួយក្នុងរយៈពេលប្រាំឆ្នាំ ដែលជំងឺតាមរដូវកាលនេះ បានវ៉ាដាច់មេរោគកូវីដ១៩ ដែលឆ្លងរាតត្បាតយ៉ាងកាចសាហាវ។

ចាប់តាំងពីកូវីដ១៩ បានចាប់ផ្តើមរីករាលដាលយ៉ាងទូលំទូលាយនៅដើមឆ្នាំ២០២០ មក កូវីដបានសម្លាប់មនុស្សជិត ៤២ដងច្រើនជាងជំងឺផ្តាសាយ នៅសហរដ្ឋអាមេរិក។ ប៉ុន្តែទិន្នន័យមរណភាពបឋមពីមជ្ឈមណ្ឌលគ្រប់គ្រង និងបង្ការជំងឺ CDC របស់សហរដ្ឋអាមេរិក បានបង្ហាញថា ឆ្នាំ២០២៥ កំពុងលេចចេញជាឆ្នាំដ៏សំខាន់សម្រាប់ជំងឺផ្តាសាយធំ។

មជ្ឈមណ្ឌល CDC បានប៉ាន់ប្រមាណថា ជំងឺផ្តាសាយធំនេះបានធ្វើឱ្យមនុស្សយ៉ាងហោចណាស់ ២៩លាននាក់ឈឺ បណ្តាលឱ្យមនុស្ស ៣៧០.០០០នាក់ ត្រូវសម្រាកនៅមន្ទីរពេទ្យ និងធ្វើឱ្យមនុស្ស ១៦.០០០នាក់ បានស្លាប់ចាប់តាំងពីខែតុលា ឆ្នាំ២០២៤ មក។

លោកវេជ្ជបណ្ឌិត Peter Chin-Hong អ្នកឯកទេសជំងឺឆ្លង និងជាសាស្រ្តាចារ្យផ្នែកវេជ្ជសាស្ត្រនៅសាកលវិទ្យាល័យកាលីហ្វ័រនីញ៉ា បានឱ្យដឹងថា ខណៈពេលដែលការភ័យខ្លាចពីការរីករាលដាលនៃជំងឺផ្តាសាយបក្សីកំពុងគ្របដណ្តប់នៅក្នុងសហរដ្ឋអាមេរិក ជំងឺផ្តាសាយធំតាមរដូវកាលបានឈានដល់កម្រិតខ្ពស់បំផុតក្នុងរយៈពេលជាង ១៥ឆ្នាំ ហើយឥឡូវនេះបានបង្កការស្លាប់លើសពីជំងឺកូវីដ១៩ ក្នុងពេលពីរខែកន្លងមកនេះ៕