ប្រធានពាណិជ្ជកម្មរបស់សហភាពអឺរ៉ុប (EU) កាលពីថ្ងៃពុធ (ទី១៩ ខែកុម្ភៈ) បានប្រាប់ឲ្យដឹងថា ប្លុកនឹងឆ្លើយតបវិញ «យ៉ាងម៉ឺងម៉ាត់ និងឆាប់រហ័ស» ដើម្បីការពារផលប្រយោជន៍ ប្រសិនបើទីក្រុងវ៉ាស៊ីនតោន អនុវត្តគោលការណ៍ដំឡើងពន្ធលើទំនិញរបស់ខ្លួន ដោយច្រានចោលការអះអាងរបស់ប្រធានាធិបតីអាមេរិក លោក Donald Trump ដែលថា ទំនាក់ទំនងពាណិជ្ជកម្ម រវាងសហរដ្ឋអាមេរិក និង EU មានភាពអយុត្តិធម៌។

ខណៈដែលអឺរ៉ុបកំពុងត្រៀមខ្លួនសម្រាប់ការកើនឡើងនូវភាពតានតឹងផ្នែកពន្ធគយ ជាមួយសហរដ្ឋអាមេរិក នៅឯទីក្រុងវ៉ាស៊ីនតោន លោក Maros Sefcovic បានប្រាប់ថា៖ «ទំនាក់ទំនងនោះគឺជាគំរូដ៏ល្អឥតខ្ជោះនៃភាពជាដៃគូឈ្នះ-ឈ្នះ ហើយមិនមានអ្វីអយុត្តិធម៌ នៅក្នុងនោះឡើយ»។

ប៉ុន្តែលោក Sefcovic បានបង្ហាញពីឆន្ទៈរបស់សហភាពអឺរ៉ុប ដើម្បីឲ្យមានកិច្ចព្រមព្រៀង ដូចជាលទ្ធភាពនៃការកាត់បន្ថយ ឬលុបចោលពន្ធលើរថយន្ត និងផលិតផលផ្សេងទៀត។

លោក បានប្រាប់អ្នកចូលរួមស្ដាប់នៅវិទ្យាស្ថានសហគ្រាសអាមេរិកថា៖ «ប្រសិនបើយើង នឹងនិយាយអំពីការបញ្ចុះពន្ធ ឬសូម្បីតែការលុបពន្ធតែម្ដង ជាពិសេសសម្រាប់ផលិតផលឧស្សាហកម្ម ចំណុចនេះនឹងក្លាយជាអ្វី ដែលយើងត្រៀមខ្លួនរួចជាស្រេច ដើម្បីបើកការពិភាក្សា»។

នៅមុនមានការពិភាក្សាជាមួយសមភាគីអាមេរិក លោក Sefcovic ដែលជាស្នងការអឺរ៉ុបទទួលបន្ទុកសន្តិសុខពាណិជ្ជកម្ម និងសេដ្ឋកិច្ច បានសង្កត់ធ្ងន់ថា៖ «យើងត្រៀមខ្លួនរួចជាស្រេច ដើម្បីពិភាក្សា និងដោះស្រាយបញ្ហាផ្សេងៗ»។

គួរបញ្ជាក់ថា ដំណើរទស្សនកិច្ចរបស់លោក Sefcovic នៅសហរដ្ឋអាមេរិកនេះ កើតមានឡើងបន្ទាប់ពីលោក Trump បានគំរាមដាក់ «ពន្ធបដិការ» (ពន្ធតបតវិញ) លើសម្ព័ន្ធមិត្ត និងគូសត្រូវ ដោយផ្តោតលើសហភាពអឺរ៉ុប សម្រាប់អ្វីដែលលោកចាត់ទុកថា មាន «ភាពអយុត្តិធម៌ធ្ងន់ធ្ងរខ្លាំង» នៅក្នុងទំនាក់ទំនងពាណិជ្ជកម្មជាមួយសហរដ្ឋអាមេរិក៕