ប្រជាជនម្ចាស់ឆ្នោតនៅប្រទេសអាល្លឺម៉ង់ ត្រៀមចេញទៅបោះឆ្នោតនៅថ្ងៃអាទិត្យ ២៣ កុម្ភៈ សប្ដាហ៍នេះ ដើម្បីជ្រើសរើសសភាថ្មី ដែលនឹងកំណត់ពីមធ្យោបាយដែលប្រទេសនេះដំណើរការសម្រាប់រយៈពេល ៤ឆ្នាំខាងមុខ។

សេដ្ឋកិច្ចធំបំផុតរបស់អឺរ៉ុបមួយនេះ គឺជាប្រទេសដែលមានប្រជាជនច្រើនជាងគេបំផុតរបស់សមាជិក ២៧ប្រទេសនៃសហភាពអឺរ៉ុប និងជាសមាជិកនាំមុខគេរបស់អង្គការណាតូ ក៏ដូចជាអ្នកផ្គត់ផ្គង់អាវុធធំទីពីរដល់អ៊ុយក្រែន បន្ទាប់ពីអាមេរិក ក្រោយប្រតិបត្តិការយោធារុស្ស៊ី ក្នុងឆ្នាំ២០២២។ រដ្ឋាភិបាលបន្ទាប់របស់អាល្លឺម៉ង់ នឹងក្លាយជាចំណុចកណ្តាលនៃការឆ្លើយតបរបស់អឺរ៉ុប ទល់នឹងលោកប្រធានាធិបតីអាមេរិក Donald Trump។

មណ្ឌលបោះឆ្នោតនឹងបើកនៅម៉ោង ៨ព្រឹក និងបិទនៅម៉ោង ៦ល្ងាច (ម៉ោងក្នុងស្រុក) ថ្ងៃអាទិត្យ ហើយពលរដ្ឋអាល្លឺម៉ង់ ក៏អាចបោះឆ្នោតដោយការដាក់សន្លឹកឆ្នោតតាមប្រៃសណីយ៍ផងដែរ ប៉ុន្តែសន្លឹកឆ្នោតនោះត្រូវតែទៅដល់មុនពេលការិយាល័យបោះឆ្នោតបិទទ្វារ ទើបអាចរាប់បាន។ លទ្ធផលផ្លូវការចុងក្រោយត្រូវបានរំពឹងទុកនៅព្រឹកថ្ងៃចន្ទបន្ទាប់។

បេក្ខជន ៤នាក់កំពុងឈរឈ្មោះជាមេដឹកនាំបន្ទាប់របស់អាល្លឺម៉ង់។ យ៉ាងហោចណាស់ពលរដ្ឋ ៥៩,២លាននាក់ ក្នុងចំណោមប្រជាជនសរុប ៨៤លាននាក់ មានសិទ្ធិបោះឆ្នោតជ្រើសរើស ប៊ុនដេស្ថេក (Bundestag) ថ្មី ឬហៅថាសភាជាន់ទាប។ បន្ទាប់មក សភា Bundestag ដែលមានសមាជិក ៦៣០អាសនៈនេះ នឹងជ្រើសរើសអធិការបតីបន្ទាប់ ដែលមានឋានៈស្មើនឹងនាយករដ្ឋមន្ត្រីរបស់អាល្លឺម៉ង់៕