រដ្ឋមន្ត្រីក្រសួងអប់រំ នៅថ្ងៃសុក្រ (ទី២១ ខែកុម្ភៈ) នេះ បាននិយាយថា នគរបាលបារាំង នឹងចាប់ផ្តើមការស្វែងរកដោយមិនកំណត់គោលដៅ ដើម្បីឆែកឆេររកកាំបិត និងអាវុធផ្សេងទៀតដែលលាក់ទុកក្នុងកាបូប ទាំងនៅ និងជុំវិញសាលារៀន ក្នុងគោលបំណងប្រយុទ្ធប្រឆាំងនឹងការកើនឡើងនូវការវាយប្រហារដោយហិង្សា។

លោកស្រី Elisabeth Borne បានប្រាប់ទូរទស្សន៍ BFMTV/RMC ថា ការស្វែងរកមិនកំណត់គោលដៅនេះ នឹងចាប់ផ្តើមនៅនិទាឃរដូវ។ លោកស្រីបាននិយាយថា៖ «ខ្ញុំចង់ឲ្យពួកយើងអាចរៀបចំ រួមជាមួយអភិបាលខេត្ត រដ្ឋអាជ្ញា និងតំណាងប្រព័ន្ធអប់រំ ឆែកឆេរកាបូបជាប្រចាំ នៅច្រកចូលសាលារៀន»។

លោកស្រីបានបន្តថា ទាំងនេះនឹងត្រូវបានអនុវត្តដោយនគរបាល ដោយសារតែគ្រូបង្រៀន និងបុគ្គលិកសាលាមិនត្រូវបានអនុញ្ញាតឲ្យឆែកឆេរកូនសិស្សនោះទេ។ លោកស្រី Borne បានបន្ថែមថា គោលនយោបាយថ្មីនេះ ត្រូវបានជំរុញដោយការចាក់នឹងកាំបិត ដែលបានក្លាយជា «រឿងធម្មតាខ្លាំងឡើងៗ»។

រដ្ឋមន្ត្រីរូបនេះ បានសង្កត់ធ្ងន់ថា លោកស្រីក៏នឹងស្វែងរកការកែប្រែច្បាប់ ដែលកំណត់ថា សិស្សណាត្រូវបានរកឃើញមានអាវុធផ្លែមុតស្រួច នៅសាលារៀន នឹងត្រូវទៅបង្ហាញខ្លួន នៅចំពោះមុខក្រុមប្រឹក្សាវិន័យ ដោយស្វ័យប្រវត្តិ។ ហើយករណីបែបនេះក៏នឹងមានការជូនដំណឹងដល់រដ្ឋអាជ្ញាផងដែរ ដោយគ្មានការលើកលែង។ បច្ចុប្បន្ន នីតិវិធីបែបនេះស្ថិតនៅក្រោមសម្រេចចិត្តរបស់នាយកសាលា។

នៅដើមខែកុម្ភៈ សិស្សវិទ្យាល័យអាយុ ១៧ឆ្នាំម្នាក់ បានរងរបួសយ៉ាងធ្ងន់ធ្ងរ ដោយសារការចាក់នឹងកាំបិត នៅសាលារបស់គេ នៅតំបន់ Bagneux ជាយក្រុងប៉ារីសភាគនិរតី៕