ក្រសួងការពារជាតិរុស្ស៊ី បាននិយាយនៅក្នុងរបាយការណ៍មួយកាលពីថ្ងៃសុក្រថា កងកម្លាំងរបស់ខ្លួន បានដណ្តើមកាន់កាប់កន្លែងតាំងទីលំនៅពីរបន្ថែមទៀត នៅក្នុងតំបន់ Donetsk ខណៈដែលយោធាអ៊ុយក្រែនបាននិយាយថា ខ្លួននៅតែបន្តកាន់កាប់ទីតាំងយុទ្ធសាស្ត្រ និងបានវាយបកដោយជោគជ័យទៅលើការវាយលុករបស់រុស្ស៊ីជាច្រើន។

យោងតាមក្រសួងការពារជាតិរុស្ស៊ី ក្នុងរយៈពេលមួយសប្តាហ៍កន្លងទៅនេះ កងទ័ពរុស្ស៊ី បានគ្រប់គ្រងកន្លែងតាំងទីលំនៅចំនួន ៧ នៅទូទាំងតំបន់ Donetsk និង Kharkiv ក៏ដូចជាតំបន់ Kursk ភាគខាងលិចនៃប្រទេសរុស្ស៊ីផងដែរ។

ក្រសួងក៏បានអះអាងដែរថា អង្គភាពការពារដែនអាកាសរបស់ខ្លួន បានស្ទាក់ចាប់គ្រាប់រ៉ូកែត HIMARS អ៊ុយក្រែនចំនួន ៣៦ គ្រាប់ និងមីស៊ីល Neptune មួយគ្រាប់។ ក្រសួងបានបន្តថា កងកម្លាំងរុស្ស៊ី ក៏បានបាញ់ទម្លាក់យន្តហោះចម្បាំង MiG-29 របស់អ៊ុយក្រែនចំនួន ២គ្រឿង និងបានធ្វើការវាយប្រហារយ៉ាងជាក់លាក់ចំនួន ១១លើក ទៅលើរោងចក្រប្រេង និងឧស្ម័នរបស់អ៊ុយក្រែន និងហេដ្ឋារចនាសម្ព័ន្ធឧស្សា ហកម្មយោធា។

អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានរាយការណ៍នៅថ្ងៃដដែលនោះថា ការប្រយុទ្ធសរុបចំនួន ៥៣លើក បានកើតឡើង នៅតាមបណ្តោយខ្សែត្រៀមជួរមុខ គិតត្រឹមរសៀលថ្ងៃសុក្រ។ យោធាអ៊ុយក្រែន បានសង្កត់ធ្ងន់ថា ខ្លួននៅតែរក្សាជំហររបស់ខ្លួនយ៉ាងរឹងមាំ និងបានរារាំងការប៉ុនប៉ងជាច្រើនរបស់    រុស្ស៊ី មិនឲ្យរុលចូលទៅមុខ។