ហ្វូងមនុស្សប្រមាណ ២៥០នាក់ បានសម្រុកតវ៉ាកាលពីថ្ងៃសៅរ៍ (២២ កុម្ភៈ) ប្រឆាំងនឹងមេដឹកនាំបក្សស្ដាំនិយមជ្រុល ជម្រើសថ្មីសម្រាប់អាល្លឺម៉ង់ (AfD) នៅក្នុងលំនៅឋានស្រុកកំណើតប្រទេសស្វីសរបស់មេដឹកនាំបក្សស្ដាំនិយមជ្រុល គឺលោកស្រី Alice Weidel ដែលនគរបាលនិយាយថា បានបង្កឱ្យមានបាតុកម្មប្រឆាំងតប នៅក្នុងស្ថានភាពដ៏តានតឹងដែលនាំឱ្យមានការចាប់ខ្លួនជាច្រើន។

ដោយស្រែកពាក្យតវ៉ាថា "ពួកណាហ្ស៊ីចេញឱ្យឆ្ងាយទៅ" និងកាន់ផ្ទាំងបដាជាមួយឃ្លាតវ៉ាដូចជា "មិនដូចឆ្នាំ១៩៣៣ ទៀតទេ" - ដែលជាការយោងទៅលើឆ្នាំដែលមេដឹកនាំផ្ដាច់ការ Adolf Hitler ឡើងកាន់អំណាច - បណ្ដាគូប្រជែងនៃជំហរអន្តោប្រវេសន៍ដ៏តឹងតែងរបស់បក្ស AfD និងគោលនយោបាយផ្សេងទៀត បានដើរតវ៉ាកាត់តាមដងផ្លូវដើម្បីរិះគន់គណបក្សនេះ។

អ្នកស្រុករាប់រយនាក់បានដើរដង្ហែរឆ្លងកាត់ទីក្រុង ក្រោមវត្តមាននគរបាលយ៉ាងតឹងរ៉ឹង។ នគរបាលពណ៌នាថា ស្ថានភាពនោះគឺតានតឹងខ្លាំង ហើយមនុស្សមួយចំនួនបានបង្កជម្លោះផ្នែករាងកាយ ប៉ុន្តែទោះជាយ៉ាងនេះក្តី ពុំមានអ្នករងរបួសត្រូវបានរាយការណ៍ទេ ហើយការរំខានធំៗត្រូវបានជៀសវាង។

ការស្ទង់មតិបង្ហាញ បក្សស្ដាំនិយមជ្រុល AfD ដោយមានការគាំទ្រប្រហែល ២០% ហើយត្រូវបានព្យាករថា នឹងជាប់លេខរៀងទីពីរ នៅក្នុងការបោះឆ្នោតសភាអាល្លឺម៉ង់ នៅថ្ងៃអាទិត្យនេះ ដែលជំរុញដោយក្ដីបារម្ភអំពីការធ្វើអន្តោប្រវេសន៍ និងការខកចិត្តចំពោះសេដ្ឋកិច្ច៕