ខណៈដែលដំណាក់កាលទីមួយនៃបទឈប់បាញ់រវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា កំពុងឈានទៅដល់ទីបញ្ចប់នៅដើមខែក្រោយ ឥឡូវនេះកិច្ចព្រមព្រៀងដ៏ផុយស្រួយនេះកំពុងស្ថិតក្នុងភាពសង្ស័យ និងមិនច្បាស់លាស់ជាថ្មីម្តងទៀត។

បន្ទាប់ពីការដោះលែងចំណាប់ថ្នូរនៅរស់ ៦នាក់ជុំចុងក្រោយកាលពីចុងសប្ដាហ៍ លោកនាយករដ្ឋមន្រ្តីអ៊ីស្រាអែល Benjamin Netanyahu បានពន្យារពេលការដោះដូរអ្នកទោសប៉ាឡេស្ទីនជាង ៦០០នាក់ ដោយទាមទារឱ្យក្រុមហាម៉ាស ត្រូវតែបញ្ឈប់នូវអ្វីដែលលោកហៅថា "ការប្រើប្រាស់ចំណាប់ថ្នូរក្នុងបំណងឃោសនាយ៉ាងឃោរឃៅ"។ ដោយឡែក ក្រុមហាម៉ាស បានចោទអ៊ីស្រាអែល ថាមានចេតនាបង្អាក់កិច្ចព្រមព្រៀងឈប់បាញ់។

ទាំងនេះជាឧបសគ្គដ៏ធំបំផុតនៅក្នុងផ្លូវឆ្ពោះទៅរកការបញ្ចប់អរិភាពជាអចិន្ត្រៃយ៍ និងការចាប់ផ្តើមកសាងតំបន់ហ្កាហ្សាឡើងវិញ បន្ទាប់ពីការចោទដាក់គ្នាទៅមកជុំវិញការរំលោភបទឈប់បាញ់ ដោយធ្វើឱ្យភាពស្រពេចស្រពិលកើនឡើងខ្លាំងបន្ថែមទៀតលើដំណាក់កាលបន្ទាប់នៃកិច្ចព្រមព្រៀង។

ចំណុចខ្ទាស់ទាំងអស់នេះបានបង្ហាញពីភាពផុយស្រួយនៃដំណើរការបទឈប់បាញ់ ដែលដំណាក់កាលទីមួយបានចូលជាធរមានកាលពីថ្ងៃ១៩ មករា ហើយនឹងត្រូវបញ្ចប់នៅថ្ងៃទី០១ ខែមីនា ខាងមុខនេះ។ បញ្ហាទាំងនេះក៏ប្រហែលជាបានជះស្រមោលលើកិច្ចចរចាដំណាក់កាលទីពីរ ដែលមិនទាន់ដំណើរការនៅឡើយទេ ខណៈពេលវេលាជិតអស់ទៅហើយ៕