ក្រុមហ៊ុនអាកាសចរណ៍បាននិយាយថា ជើងហោះហើរ AAL.O របស់ក្រុមហ៊ុនអាកាសចរណ៍ American Airlines ពីទីក្រុង New York ទៅកាន់ទីក្រុង New Delhi ប្រទេសឥណ្ឌា ត្រូវបានបង្វែរទិសដៅទៅកាន់ទីក្រុងរ៉ូម ប្រទេសអ៊ីតាលី កាលពីថ្ងៃអាទិត្យ ទី២៣ ខែកុម្ភៈ ដោយសារការព្រួយបារម្ភអំពីសុវត្ថិភាព ដែលក្រោយមកបានកំណត់ថា «មិនគួរឱ្យទុកចិត្ត»។

ក្រុមហ៊ុននិយាយថា ជើងហោះហើរនេះ បានចុះចតដោយសុវត្ថិភាពនៅទីក្រុងរ៉ូម ហើយនឹងចេញដំណើរទៅកាន់ទីក្រុង New Delhi នៅថ្ងៃច័ន្ទនេះ។

ជើងហោះហើរនេះ បានចេញដំណើរពីអាកាសយានដ្ឋានអន្តរជាតិ John F. Kennedy ឆ្ពោះទៅកាន់អាកាសយានដ្ឋានអន្តរជាតិ Indira Gandhi ក្នុងទីក្រុង New Delhi។

ក្រុមហ៊ុនអាកាសចរណ៍ American Airlines និយាយនៅក្នុងសេចក្តីថ្លែងការណ៍ថា «ក្រុមហ៊ុនអាកាសចរណ៍អាមេរិកជើងហោះហើរ២៩២ ជាមួយនឹងការបម្រើសេវាពីទីក្រុង New York ទៅកាន់ទីក្រុង Delhi បានបង្វែរទិសដៅទៅកាន់ទីក្រុងរ៉ូម ដោយសារការព្រួយបារម្ភអំពីសុវត្ថិភាពដែលអាចកើតមាន»។

អាជ្ញាធរអនុវត្តច្បាប់ទីក្រុងរ៉ូម បានត្រួតពិនិត្យ និងបោសសម្អាតយន្តហោះ ដើម្បីបន្តដំណើរឡើងវិញ។ ក្រុមហ៊ុន និយាយថា ជើងហោះហើរនេះ ស្នាក់នៅមួយយប់ក្នុងទីក្រុងរ៉ូម ដើម្បីអនុញ្ញាតឱ្យក្រុមយានិកសម្រាក មុនពេលបន្តទៅទីក្រុង Delhi នៅថ្ងៃចន្ទនេះ។

យោងតាមប្រភពព័ត៌មានពីអាកាសយានដ្ឋាន បានឱ្យដឹងថា ជើងហោះហើរ Boeing 787-9 Dreamliner ដែលមានអ្នកដំណើរប្រហែល២០០នាក់នៅលើយន្តហោះ បានចុះចតនៅអាកាសយានដ្ឋាន Leonardo da Vinci ទីក្រុងរ៉ូម ដោយសុវត្ថិភាព។ ប្រភពបាននិយាយបន្ថែមថា យន្តហោះបានហោះពីលើសមុទ្រ Caspian នៅពេលនោះក្រុមហ៊ុនអាកាសចរណ៍ បានព្រមានក្រុមយានិកអំពីការគំរាមកំហែងគ្រាប់បែក។