សហរដ្ឋអាមេរិក កំពុងជំរុញឱ្យមហាសន្និបាតអង្គការសហប្រជាជាតិ គាំទ្រសេចក្ដីសម្រេចរបស់ខ្លួនដើម្បីប្រារព្ធខួបលើកទីបីនៃជម្លោះរុស្ស៊ី-អ៊ុយក្រែន នៅថ្ងៃចន្ទ (២៤ កុម្ភៈ) នេះ ហើយជំរុញប្រទេសនានាឱ្យជំទាស់នឹងវិសោធនកម្មណាមួយ និងបោះឆ្នោត "ប្រឆាំង" លើញត្តិប្រជែងដែលព្រាងដោយអ៊ុយក្រែន និងសម្ព័ន្ធមិត្តអឺរ៉ុប។

នៅក្នុងលិខិតការទូតដែលបានផ្ញើកាលពីថ្ងៃអាទិត្យ និងពិនិត្យដោយសារព័ត៌មានរ៉យទ័រ សហរដ្ឋអាមេរិកបានពណ៌នាអំពីសេចក្ដីសម្រេចសង្ខេបរបស់ខ្លួនថាជា "ដំណោះស្រាយឆ្ពោះទៅមុខផ្តោតលើគំនិតសាមញ្ញមួយគឺការបញ្ចប់សង្គ្រាម" ដោយស្នើឱ្យប្រទេសនានា "បោះឆ្នោតប្រឆាំងលើសេចក្ដីសម្រេច ឬវិសោធនកម្មផ្សេងទៀតដែលដាក់ឡើង" ក្នុងអំឡុងពេលកិច្ចប្រជុំនៅថ្ងៃចន្ទនេះ។

ពង្រាងសេចក្តីសម្រេចរបស់អាមេរិក ដែលដាក់ចេញកាលពីថ្ងៃសុក្រ បានប្រឆាំងនឹងពង្រាងរបស់អ៊ុយក្រែន និងសហភាពអឺរ៉ុប ដែលអស់រយៈពេលមួយខែកន្លងមកនេះ កំពុងចរចាជាមួយរដ្ឋសមាជិកអង្គការសហប្រជាជាតិ លើសេចក្ដីសម្រេចផ្ទាល់ខ្លួនរបស់ពួកគេជុំវិញសង្គ្រាមនៅអ៊ុយក្រែន ដែលបញ្ជាក់ពីជំហររបស់អង្គការសហប្រជាជាតិម្តងទៀត ក្នុងការទាមទារឱ្យរុស្ស៊ី ដកទ័ព និងបញ្ឈប់អរិភាព។

រុស្ស៊ី បានស្នើវិសោធនកម្មលើសេចក្តីព្រាងច្បាប់អាមេរិក ឱ្យយោងលើ "មូលហេតុឬសគល់" នៃសង្រ្គាម។ គួរបញ្ជាក់ថា រុស្ស៊ី បានហៅជម្លោះឆ្នាំ២០២២ របស់ខ្លួនថាជា "ប្រតិបត្តិការយោធាពិសេស" ដែលរៀបចំឡើងដើម្បី "លុបបំបាត់ឥទ្ធិពលពួកណាហ្ស៊ី" នៅអ៊ុយក្រែន និងបញ្ឈប់ការពង្រីកអង្គការណាតូ៕