បេសកជនពិសេសរបស់ប្រធានាធិបតីអាមេរិក លោក Donald Trump គឺលោក Steve Witkoff និងរដ្ឋមន្ត្រីក្រសួងរតនាគារ លោក Scott Bessent កាលពីថ្ងៃអាទិត្យ (ទី២៣ ខែកុម្ភៈ) បាននិយាយថា ពួកគេរំពឹងថា កិច្ចព្រមព្រៀងមួយនឹងត្រូវបានចុះហត្ថលេខាក្នុងសប្តាហ៍នេះ ស្តីពីលទ្ធភាពទទួលបានរបស់សហរដ្ឋអាមេរិក សម្រាប់ធនធានរ៉ែដ៏កម្ររបស់ប្រទេសអ៊ុយក្រែន។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ CNN State Of The Union ដោយសំដៅទៅលើការបដិសេធរបស់មេដឹកនាំអ៊ុយក្រែន ចំពោះសំណើដើមរបស់សហរដ្ឋអាមេរិក លោក Witkoff បាននិយាយថា៖ «ប្រធានាធិបតីអ៊ុតក្រែន លោក Volodymyr Zelensky បានបង្ហាញភាពអល់អែក ចំពោះការប្ដេជ្ញាចិត្តរបស់លោក សម្រាប់រឿងនេះ កាលពីសប្ដាហ៍កន្លងទៅ។លោក ប្រធានាធិបតី (Trump) បានផ្ញើសារទៅលោក។ ដូច្នេះ លោកមិនស្ទាក់ស្ទើរទៀតទេ»។

លោក Witkoff បានបន្ថែមថា៖ «លោក Zelensky បានដឹងច្បាស់ថា យើងបានធ្វើអ្វីៗច្រើនណាស់ (សម្រាប់អ៊ុយក្រែន) ហើយខ្ញុំគិតថា អ្នកនឹងឃើញវា (កិច្ចព្រមព្រៀង) ត្រូវបានចុះហត្ថលេខា នៅសប្តាហ៍នេះ»។

គួរបញ្ជាក់ថា លោក Zelensky បានច្រានចោលនូវសំណើររបស់សហរដ្ឋអាមេរិក ដើម្បីទទួលបានធនធានរ៉ែ ក្នុងតម្លៃ ៥០០ពាន់លានដុល្លារ ពីអ៊ុយក្រែន ដែលជាសំណងឲ្យទៅទីក្រុងវ៉ាស៊ីនតោន សម្រាប់ជំនួយ ក្នុងសម័យសង្គ្រាម ដោយនិយាយថា សហរដ្ឋអាមេរិកមិនបានផ្គត់ផ្គង់រហូតដល់ចំនួននោះទេ៕