កំណើនជាប្រវត្តិសាស្ត្រក្នុងការគាំទ្ររបស់គណបក្សប្រឆាំងអន្តោប្រវេសន៍ ជម្រើសថ្មីសម្រាប់អាល្លឺម៉ង់ (AfD) ស្ដាំនិយមជ្រុល ក្នុងការបោះឆ្នោតជាតិកាលពីថ្ងៃអាទិត្យ ២៣ កុម្ភៈ បានធ្វើឱ្យជនអន្តោប្រវេសន៍ជាច្រើនប្រឈមភាពមិនច្បាស់លាស់ និងព្រួយបារម្ភពីអនាគតរបស់ពួកគេ ខណៈប្រទេសនេះកំពុងងាកទៅរកនយោបាយស្ដាំនិយម។

គោលនយោបាយសិទ្ធិជ្រកកោនរបស់អាល្លឺម៉ង់ គឺជាប្រធានបទដ៏ធំបំផុតមួយនៅក្នុងការបោះឆ្នោតឆ្នាំនេះ ដោយជំរុញឱ្យក្រុមអភិរក្សនិយម ដែលប្រកាន់ជំហរស្ដាំនិយមកណ្ដាល ទទួលបានជ័យជម្នះ ហើយបក្សស្ដាំនិយមជ្រុល AfD ឈរនៅលេខរៀងទី២ ដែលបក្សទាំងពីរនេះសុទ្ធតែមានជំហរតឹងរ៉ឹងលើអន្តោប្រវេសន៍។

ស្របពេលមានវិបត្តិសេដ្ឋកិច្ច ពលរដ្ឋអាល្លឺម៉ង់ដែលមានប្រវត្តិអន្តោប្រវេសន៍ មានការព្រួយបារម្ភកាន់តែខ្លាំងពីហិរញ្ញវត្ថុរបស់ពួកគេ ជាជាងអ្នកផ្សេងទៀត។ ការសិក្សារបស់ស្ថាប័នស្រាវជ្រាវ DeZIM ថ្មីៗនេះបានរកឃើញថា តួលេខ ៦៣,៤% នៃជនអន្តោប្រវេសន៍មានក្ដីបារម្ភបែបនេះ ធៀបនឹងតួលេខ ៤៦,៧% នៃអ្នកដែលមិនមែនជាជនអន្តោប្រវេសន៍។

ចំនួនអន្តោប្រវេសន៍ដែលតាំងទីលំនៅក្នុងអាល្លឺម៉ង់ មានចំនួនខ្ពស់ខ្លាំងណាស់។ ជនជាតិអាល្លឺម៉ង់ជាង ៧លាននាក់ ដែលមានប្រវត្តិអន្តោប្រវេសន៍ មានសិទ្ធិបោះឆ្នោតនៅក្នុងការបោះឆ្នោតនេះ ដោយរាប់សែននាក់ជាអតីតជនភៀសខ្លួន។ ជាប្រវត្តិសាស្ត្រ បក្សប្រជាធិបតេយ្យសង្គមនិយម (SPD) របស់អាល្លឺម៉ង់ គឺមានប្រជាប្រិយភាពបំផុតក្នុងចំណោមជនអន្តោប្រវេសន៍ ដោយសារតែការតស៊ូមតិរបស់ខ្លួនសម្រាប់សិទ្ធិកម្មករ សុខុមាលភាពសង្គម និងបរិយាបន្ន ប៉ុន្តែបក្សនេះបែរជាចាញ់យ៉ាងជូរចត់បំផុតក្នុងការបោះឆ្នោតនេះទៅវិញ៕