យានឈូសឆាយរបស់អ៊ីស្រាអែល បានវាយកម្ទេចតំបន់ធំៗនៃជំរំជនភៀសខ្លួន Jenin ស្ទើរតែខ្ទេចខ្ទីអស់ ហើយហាក់ដូចជាកំពុងបើកផ្លូវធំទូលាយកាត់តាមដងផ្លូវដែលមានពលរដ្ឋប៉ាឡេស្ទីនច្រើនកកកុញនៅជំរំរបស់ដែនដីកាន់កាប់ West Bank ដែលយុទ្ធសាស្ត្របែបនេះបានប្រើរួចទៅហើយនៅតំបន់ហ្កាហ្សា ខណៈទាហានត្រៀមខ្លួនសម្រាប់ការស្នាក់នៅរយៈពេលវែង។

ប្រជាជនប៉ាឡេស្ទីនពោរពេញទៅដោយភាពភ័យខ្លាច ដោយយ៉ាងហោចណាស់អ្នកស្រុក ៤០.០០០នាក់ បានចាកចេញពីផ្ទះសម្បែងរបស់ពួកគេនៅក្នុងទីក្រុង Jenin និងទីក្រុង Tulkarm ក្បែរនោះ នៅភាគខាងជើងតំបន់ West Bank ចាប់តាំងពីអ៊ីស្រាអែល បានចាប់ផ្តើមប្រតិបត្តិការរបស់ខ្លួន ត្រឹមតែមួយថ្ងៃប៉ុណ្ណោះបន្ទាប់ពីការឈានដល់កិច្ចព្រមព្រៀងបទឈប់បាញ់នៅក្នុងតំបន់ហ្កាហ្សា ក្រោយសង្រ្គាមជាង ១៥ខែ។

អ្នកនាំពាក្យសាលាក្រុង Jenin បាននិយាយថា "ជំរំ Jenin គឺជារឿងដដែលៗនៃអ្វីដែលបានកើតឡើងនៅតំបន់ Jabalia" ដោយសំដៅលើជំរំជនភៀសខ្លួននៅភាគខាងជើងហ្កាហ្សា ដែលត្រូវបានបោសសម្អាតដោយកងទ័ពអ៊ីស្រាអែល បន្ទាប់ពីការប្រយុទ្ធគ្នាដ៏ជូរចត់ជាច្រើនសប្តាហ៍នៅទីនោះ។

មិនមានការអត្ថាធិប្បាយភ្លាមៗពីយោធាអ៊ីស្រាអែលទេ ប៉ុន្តែកាលពីថ្ងៃអាទិត្យ (២៣ កុម្ភៈ) រដ្ឋមន្ត្រីការពារជាតិអ៊ីស្រាអែល លោក Israel Katz បានបញ្ជាឱ្យកងទ័ពរៀបចំសម្រាប់ "ការស្នាក់នៅរយៈពេលយូរ" ដោយនិយាយថា ជំរំជាច្រើនត្រូវបានសម្អាត "នៅឆ្នាំខាងមុខនេះ" ហើយអ្នកស្រុកនឹងមិនអនុញ្ញាតឱ្យត្រឡប់ទៅវិញទេ៕