ប្រធានាធិបតីរុស្ស៊ី លោក Vladimir Putin និយាយថា ប្រទេសរបស់លោក ត្រៀមជាស្រេចដើម្បីធ្វើការជាមួយ «ដៃគូបរទេស រួមទាំងជនជាតិអាមេរិក» លើការអភិវឌ្ឍន៍ធនធានរ៉ែនៅក្នុងប្រទេសរុស្ស៊ី រួមទាំងតំបន់នៅអ៊ុយក្រែនចំនួនបួនដែលទីក្រុងមូស្គូគ្រប់គ្រង។

លោក Putin បានថ្លែងដូច្នេះ ទាក់ទងនឹងការទាមទាររបស់ប្រធានាធិបតីសហរដ្ឋអាមេរិក លោក Donald Trump សម្រាប់សិទ្ធិទទួលបានលោហៈធាតុកម្រ និងធនធានរ៉ែផ្សេងទៀតនៅក្នុងប្រទេសអ៊ុយក្រែន ជាថ្នូរទៅនឹងជំនួយយោធារបស់ទីក្រុងវ៉ាស៊ីនតោន។

លោក Putin បាននិយាយនៅក្នុងបទសម្ភាសន៍តាមទូរទស្សន៍ដោយប្រព័ន្ធផ្សព្វផ្សាយរដ្ឋ កាលពីថ្ងៃចន្ទថា កិច្ចព្រមព្រៀងធនធានកម្រ រវាងសហរដ្ឋអាមេរិក និងអ៊ុយក្រែន ពុំមែនជារឿងរបស់លោកទេ។ លោកបាននិយាយបន្ថែមថា លោកគ្មានបំណងធ្វើការវាយតម្លៃលើបញ្ហានេះទេ ហើយលោកក៏មិនចង់គិតអំពីរឿងនេះដែរ។

លោកប្រធានាធិបតី ក៏បាននិយាយផងដែរថា មានធនធានបំរុងមួយចំនួននៅក្នុងអ្វីដែលគេហៅថា «ដែនដីថ្មី» ឬ «ដែនដីប្រវត្តិសាស្ត្រ» របស់រុស្ស៊ី និយាយសំដៅទៅលើតំបន់របស់អ៊ុយក្រែនចំនួនបួនដែលបច្ចុប្បន្ននេះ គ្រប់គ្រងដោយទីក្រុងមូស្គូ។

លោក Putin ក៏បាននិយាយសំដៅទៅលើការប្រឆាំងពីបណ្តាប្រទេសនៅអឺរ៉ុប ចំពោះកិច្ចចរចាសន្តិភាព ដឹកនាំដោយសហរដ្ឋអាមេរិក និងរុស្ស៊ី ក្នុងគោលបំណងបញ្ចប់ការប្រយុទ្ធគ្នានៅអ៊ុយក្រែន។ លោក បានបង្ហាញឆន្ទៈស្វាគមន៍ការចូលរួមរបស់សហភាពអឺរ៉ុប ក្នុងការចរចា ប្រសិនបើពួកគេចង់ត្រឡប់ទៅវិញ។

លោក Putin បានបង្ហាញការគាំទ្ររបស់លោកចំពោះកិច្ចខិតខំប្រឹងប្រែងរបស់លោក Trump ក្នុងការសម្រេចបានសន្តិភាពនៅក្នុងប្រទេសអ៊ុយក្រែន ខណៈបានរិះគន់ប្រធានាធិបតីអ៊ុយក្រែន លោក Volodymyr Zelenskyy ចំពោះការបិទច្រកឈានឆ្ពោះទៅរកសន្តិភាព។