សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានមានប្រសាសន៍ជំរុញឱ្យ និស្សិត និងប្រជាពលរដ្ឋយកចិត្តទុកដាក់លើការអភិវឌ្ឍសមត្ថភាពដែលជាកត្តាសំខាន់ ដើម្បីរត់ឱ្យទាន់ ការវិវត្តរីកចម្រើនយ៉ាងឆាប់រហ័សនៃបច្ចេកវិទ្យា ។

ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រកម្រិតបរិញ្ញាបត្ររង បរិញ្ញាបត្រ និងបរិញ្ញា បត្រជាន់ខ្ពស់ដល់និស្សិតជ័យលាភី នៃសាកលវិទ្យាល័យ Southeast Asia នៅខេត្តសៀមរាប នាព្រឹក មិញនេះ សម្តេចធិបតី ហ៊ុន​ម៉ាណែត បានមានប្រសាសន៍រម្លឹកពីការវិវត្តរីកចម្រើនយ៉ាងឆាប់​រហ័ស​ផ្នែក បច្ចេកវិទ្យាឌីជីល ដែលប្រជាពលរដ្ឋ ទោះរស់នៅតំបន់ដាច់ស្រយាលបែបណាក៏ដោយ ក៏មានទូរស័ព្ទដៃ ​ប្រើប្រាស់ដែរ ដើម្បីប្រសិទ្ធផលនៃការងារ ក្នុងការប្រទាក់ក្រឡាលើគ្រប់វិស័យ។ នេះជាកិច្ចការសំខាន់ ដែលរាជរដ្ឋាភិបាលបាននឹងកំពុងជំរុញការកសាងហេដ្ឋារចនា​សម្ព័ន្ធឌីជីថល។

សម្តេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាលបានផ្តល់អាទិភាពខ្ពស់ទៅលើការ លើកកម្ពស់វិស័យអប់រំ បណ្តុះបណ្តាលវិជ្ជាជីវៈ សំដៅពន្លឿនការពង្រីកធនធានមនុស្ស និងការ​ពង្រឹង​មូល ធនមនុស្សដែលអាចឆ្លើយតបទាន់ពេលវេលាទៅនឹងសេចក្តីត្រូវការ​នៃវិវត្តនៅក្នុងសង្គម​សេដ្ឋកិច្ចកម្ពុជា។ ដើម្បីឆ្លើយតបទាន់ពេលវេលាទៅនឹងសេចក្ដីត្រូវការនេះ សម្រាប់កសាងហេដ្ឋា​រចនាសម្ព័ន្ធអប់រំ មានជា អាទិ៍ គ្រឹះស្ថានឧត្តមសិក្សា មជ្ឈមណ្ឌលបណ្តុះបណ្តាលបច្ចេកវិទ្យា សាលារៀន បណ្ណាល័យ ជាដើម ដែលទាំងរដ្ឋ និងឯកជន កំពុងរីកលូតលាស់យ៉ាងរហ័ស ទាំងបរិមាណ និងគុណភាពគួរឱ្យកត់សម្គាល់ ហើយជាលទ្ធផលនេះ ក៏បានឆ្លុះបញ្ចាំងពីការកើន​ឡើងនូវចំនួននិស្សិតនៅកម្ពុជាយ៉ាងច្រើន បានចូលរួម ប្រកួតប្រជែងសមត្ថភាពលើមុខជំនាញ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យាទាំងនៅក្នុងតំបន់ និងអន្តរជាតិ៕ អត្ថបទ៖ មុត សុទ្ធ