យោងតាមការអះអាងរបស់មនុស្សជំនិតនឹងរឿងមួយនេះ បានឲ្យដឹងថា ក្រុមហ៊ុនមេរបស់ក្រុមហ៊ុនអាកាសចរណ៍ជប៉ុន ANAនឹងបញ្ជាទិញយន្តហោះយ៉ាងហោច ៧៧គ្រឿងពីក្រុមហ៊ុន Boeing, Airbus និងក្រុមហ៊ុន Embraer នៅក្នុងកិច្ចព្រមព្រៀងដំណាលគ្នាដ៏កម្រមួយជាមួយក្រុមហ៊ុនផលិតយន្តហោះពាណិជ្ជកម្មកំពូលទាំង ៣របស់ពិភពលោក ។

មនុស្សជំនិតម្នាក់ដែលសុំមិនផ្តល់អត្តសញ្ញាណដោយសារវាគឺជាព័ត៌មានឯកជន បាននិយាយថា ក្រុមហ៊ុនអាកាសចរណ៍ធំបំផុតរបស់ជប៉ុនមួយនេះ ទទួលបានការអនុម័តពីក្រុមប្រឹក្សាភិបាលរបស់ខ្លួន ដើម្បីទិញយន្តហោះ 787-9 Dreamliners ចំនួន ១៨គ្រឿង និងយន្តហោះ 737-8 Max ចំនួន ១២គ្រឿងពីក្រុមហ៊ុន Boeing ។

ពួកគេនឹងទិញយន្តហោះ Airbus A321neo ចំនួន ២៧គ្រឿងដែលរួមទាំងយន្តហោះ XLR ចំនួន ៣គ្រឿង និងយន្តហោះ E190-E2 ចំនួន ២០គ្រឿងពីក្រុមហ៊ុន Embraer របស់ប្រេស៊ីល ។

ការបញ្ជាទិញនេះដែរ បានគូសបញ្ជាក់ពីមហិច្ឆតារបស់ក្រុមហ៊ុន ANA ក្នុងការពង្រីកទំហំកងយន្តហោះរបស់ពួកគេនៅឆ្នាំ ២០២៣ ក៏ដូចជាទាញយកប្រយោជន៍ពីការកើនឡើងតម្រូវការធ្វើដំណើរតាមផ្លូវអាកាសសកល ។

លោក Shinichi Inoue គឺជាប្រធានប្រតិបត្តិក្រុមហ៊ុន ANA ធ្លាប់បាននិយាយកាលពីឆ្នាំមុនថា ក្រុមហ៊ុនរបស់លោក បានពិចារណាលើការបញ្ជាទិញយន្តហោះបន្ថែមទៀត ៕