ប្រធានាធិបតីអាមេរិក លោក Donald Trump បានបើកសមរភូមិពាណិជ្ជកម្មថ្មីមួយទៀតកាលពីថ្ងៃអង្គារ (២៥ កុម្ភៈ) ក្នុងការវាយលុករបស់លោកលើបទដ្ឋានពាណិជ្ជកម្មពិភពលោក ដោយបញ្ជាឱ្យស៊ើបអង្កេតលើលទ្ធភាពនៃការដំឡើងពន្ធថ្មីក្នុងការនាំចូលទង់ដែង ដើម្បីកសាងឡើងវិញនូវផលិតកម្មលោហៈធាតុដែលសំខាន់សម្រាប់រថយន្តអគ្គិសនី គ្រឿងយោធា បណ្តាញអគ្គិសនី និងទំនិញប្រើប្រាស់ជាច្រើនទៀតរបស់អាមេរិក។

ដោយចង់រារាំងនូវអ្វីដែលទីប្រឹក្សារបស់លោកមើលឃើញថាជាជំហានរបស់ចិនក្នុងការគ្រប់គ្រងទីផ្សារទង់ដែងពិភពលោក លោក Trump បានចុះហត្ថលេខាលើក្រឹត្យមួយនៅឯសេតវិមាន ដែលបញ្ជាឱ្យរដ្ឋមន្រ្តីពាណិជ្ជកម្មអាមេរិក ចាប់ផ្តើមការស៊ើបអង្កេតសន្តិសុខជាតិក្រោមមាត្រាទី២៣២ នៃច្បាប់ពង្រីកពាណិជ្ជកម្មឆ្នាំ១៩៦២។ នោះជាច្បាប់ដដែល ដែលលោក Trump ធ្លាប់បានប្រើក្នុងអាណត្តិដំបូងរបស់លោកដើម្បីដាក់ពន្ធបន្ថែមជាសកល ២៥% លើដែកថែប និងអាលុយមីញ៉ូម។

ប្រភពពីមន្ត្រីសេតវិមានម្នាក់បានប្រាប់ថា អត្រាដំឡើងពន្ធដែលអាចកើតមាននេះ នឹងត្រូវបានកំណត់ដោយការស៊ើបអង្កេត ដោយបន្ថែមថា លោក Trump ចូលចិត្តដំឡើងពន្ធ ជាជាងកូតា។

នេះជាវិធានការចុងក្រោយបំផុតរបស់លោក Trump ក្នុងការកែប្រែការគាំទ្រផ្នែកធុរកិច្ចជាច្រើនទសវត្សរ៍សម្រាប់ពាណិជ្ជកម្មសេរី ដែលលោកតែងតែចោទប្រកាន់ថា ប៉ះពាល់ដល់មូលដ្ឋានឧស្សាហកម្មរបស់សហរដ្ឋអាមេរិក ហើយភាពចលាចលនេះសំដៅទៅលើសម្ព័ន្ធមិត្តដ៏យូរលង់របស់សហរដ្ឋអាមេរិក ដូចជាកាណាដា និងម៉ិកស៊ិក ក៏ដូចជាគូប្រជែងភូមិសាស្ត្រនយោបាយដ៏ធំ ដូចជាប្រទេសចិនជាដើម៕