អង្គការសុខភាពពិភពលោក WHO បានសម្ដែងការព្រួយបារម្ភយ៉ាងខ្លាំងកាលពីថ្ងៃអង្គារ (២៥ កុម្ភៈ) ពីកំណើនអំពើហិង្សានៅក្នុងតំបន់ប៉ាឡេស្ទីន West Bank ដែលអ៊ីស្រាអែលកាន់កាប់ និងផលប៉ះពាល់យ៉ាងធ្ងន់ធ្ងរនៃអ្វីដែលខ្លួនហៅថា "កំណើនការវាយប្រហារដ៏ធំ" លើប្រព័ន្ធថែទាំសុខភាព។

អ៊ីស្រាអែល បានបញ្ជូនរថក្រោះចូលទៅក្នុងតំបន់ West Bank ជាលើកដំបូងក្នុងពេលជាង ២០ឆ្នាំកាលពីថ្ងៃអាទិត្យសប្ដាហ៍មុន ហើយបានបញ្ជាឱ្យយោធាត្រៀមស្នាក់នៅរយៈពេលយូរដើម្បីប្រយុទ្ធប្រឆាំងនឹងក្រុមសកម្មប្រយុទ្ធប៉ាឡេស្ទីន នៅក្នុងជំរំជនភៀសខ្លួនក្នុងតំបន់នេះ។

តំណាងអង្គការ WHO ប្រចាំនៅតំបន់ West Bank និង Gaza បានប្រាប់អ្នកយកព័ត៌មានថា "ស្ថាប័នសុខភាពពិភពលោកមួយនេះព្រួយបារម្ភខ្លាំងចំពោះស្ថានការណ៍នៅ West Bank និងផលប៉ះពាល់លើប្រព័ន្ធសុខាភិបាល ដោយសារតែកំណើនយ៉ាងក្ដៅគគុកនៃអំពើហិង្សា និងការវាយប្រហារលើកន្លែងថែទាំសុខភាព"។

យោធាអ៊ីស្រាអែលនិយាយថា "អង្គការភេរវកម្ម និងជាពិសេសក្រុមហាម៉ាស បានប្រើប្រាស់មន្ទីរពេទ្យ និងរថយន្តគិលានសង្គ្រោះជាឧបករណ៍សម្រាប់សកម្មភាពភេរវកម្មរបស់ខ្លួន ខណៈបានចាត់វិធានការដើម្បីរារាំងការបង្កគ្រោះថ្នាក់ដល់បុគ្គលិកពេទ្យ ហើយប្រតិបត្តិការយោធាគឺចាំបាច់ដើម្បីធានាសុវត្ថិភាពរបស់ពលរដ្ឋអ៊ីស្រាអែល"៕