ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃពុធនេះថា មេដឹកនាំប្រទេសកូរ៉េខាងជើង លោក គីម ជុងអ៊ុន បានអំពាវនាវឱ្យមានការកសាងកងទ័ពដ៏រឹងមាំ និងទំនើប ដើម្បីត្រៀមទប់ទល់ចំពោះសង្គ្រាមណាមួយ ក្នុងអំឡុងពេលដំណើរទស្សនកិច្ចទៅកាន់សាលាយោធា។

ដំណើរទស្សនកិច្ចរបស់លោក Kim ទៅកាន់សាលាយោធា Kang Kon ធ្វើឡើង បន្ទាប់ពីប្រទេសកូរ៉េខាងជើង បានបញ្ជូនទាហានរាប់ពាន់នាក់ទៅកាន់ប្រទេសរុស្ស៊ី ដើម្បីគាំទ្រសង្រ្គាមប្រឆាំងអ៊ុយក្រែន។

ក្នុងសប្តាហ៍នេះ លោក Kim ក៏បានទៅធ្វើទស្សនកិច្ចនៅសាកលវិទ្យាល័យនយោបាយ Kim Il Sung ដោយបានអំពាវនាវឱ្យមានភក្តីភាព និងការលះបង់របស់យោធា។

ទីភ្នាក់ងារស៊ើបការណ៍សម្ងាត់របស់ប្រទេសកូរ៉េខាងត្បូង បាននិយាយថា ការត្រួតពិនិត្យអង្គភាពយោធា និងការហ្វឹកហ្វឺន កាលពីពេលមុនរបស់លោក គីម អាចជាផ្នែកនៃការត្រៀមសម្រាប់ការបញ្ជូនទាហានបន្ថែមទៀតទៅកាន់ប្រទេសរុស្ស៊ី។

ទីភ្នាក់ងារសារព័ត៌មាន KCNA បាននិយាយថា ក្នុងអំឡុងដំណើរទស្សនកិច្ចចុងក្រោយទៅកាន់សាលាយោធា លោក Kim បានរិះគន់ការគ្រប់គ្រង និងប្រតិបត្តិការមិនបានល្អរបស់សាលា ដោយនិយាយថា សាលា មិនបានបំពេញតាមបំណងរបស់គណបក្សកាន់អំណាចនៃការធ្វើ «ទំនើបកម្ម និងលក្ខណៈឈានមុខ» ក្នុងការកសាងកងទ័ពដ៏មានឥទ្ធិពល។