ប្រធានាធិបតីអេហ្ស៊ីប លោក អាប់ដែល ហ្វាតាអាល់ស៊ីស៊ី ( Abdel-Fattah al-Sisi) កាលពីថ្ងៃអង្គារ បានសង្កត់ធ្ងន់ពីភាពចាំបាច់នៃការចាប់ផ្តើមផែនការស្តារ និងកសាងឡើងវិញ នៅតំបន់ហ្កាហ្សាស្ទ្រីប ដោយមិនមានការផ្លាស់ប្តូរទីលំនៅរបស់ប្រជាជននៃដែនដីនេះ។

ការិយាល័យប្រធានាធិបតីអេហ្ស៊ីប បានឲ្យដឹងនៅក្នុងសេចក្តីថ្លែងការណ៍មួយថា លោក ស៊ីស៊ី បានធ្វើការអត្ថាធិប្បាយ ក្នុងអំឡុងពេលកិច្ចប្រជុំនៅទីក្រុងគែរ ជាមួយលោក Ammar Al-Hakim ដែលជាបព្វជិតដ៏មានឥទ្ធិពល និងជាអ្នកនយោបាយមកពីប្រទេសអ៊ីរ៉ាក់។

សេចក្តីថ្លែងការណ៍បានបន្ថែមថា ភាគីទាំងពីរ បានឯកភាពគ្នាលើតម្រូវការបន្ទាន់សម្រាប់ការអនុវត្តជាដំណាក់កាលពេញលេញនៃកិច្ចព្រមព្រៀងឈប់បាញ់ ដែលកំពុងបន្តនៅតំបន់ហ្កាហ្សា ការដោះដូរ ចំណាប់ថ្នូរអ៊ីស្រាអែល និងអ្នកឃុំឃាំងប៉ាឡេស្ទីន និងការបញ្ចូលជំនួយមនុស្សធម៌ ចូលទៅក្នុងតំបន់ហ្កាហ្សា។

ពួកគេបានច្រានចោលសំណើណាមួយ ដើម្បីផ្លាស់ទីលំនៅប្រជាជនប៉ាឡេស្ទីន ដែលពួកគេបាននិយាយថា អាចបំផ្លាញបញ្ហាប៉ាឡេស្ទីន និងគំរាមកំហែងដល់សន្តិសុខនៃបណ្តាប្រទេសក្នុងតំបន់។

ភាគីទាំងពីរ បានគូសបញ្ជាក់ពីការបង្កើតរដ្ឋប៉ាឡេស្ទីនឯករាជ្យមួយ ដោយផ្អែកលើព្រំដែនឆ្នាំ ១៩៦៧ ជាការធានាតែមួយគត់សម្រាប់ការធានាដល់សន្តិភាពយូរអង្វែង នៅក្នុងតំបន់។

ប្រទេសអេហ្ស៊ីប បាននិងកំពុងបង្កើនកិច្ចខិតខំប្រឹងប្រែង ដើម្បីគាំទ្រដល់តំបន់ហ្កាហ្សា ដែលបំផ្លិចបំផ្លាញដោយសង្រ្គាម ដោយការទទួល និងព្យាបាលអ្នកស្រុកដែលឈឺ និងរងរបួស ការផ្តល់ជំនួយ និងការជំរុញការកសាងតំបន់ហ្កាហ្សាស្ទ្រីបឡើងវិញ។