នាយករដ្ឋមន្ត្រីប៉ូឡូញ លោក Donald Tusk នៅថ្ងៃពុធ (ទី២៦ ខែកុម្ភៈ) បាននិយាយថា បណ្ដាមេដឹកនាំអឺរ៉ុប ត្រូវតែតទល់នឹង «ការព្រមចុះញ៉ម» ចំពោះរុស្ស៊ី ជុំវិញបញ្ហាអ៊ុយក្រែន ដោយការលើកឡើងនេះ កើតមាននៅមុនពេលកិច្ចប្រជុំនិម្មិតរបស់មេដឹកនាំសហភាពអឺរ៉ុប (EU) ដើម្បីពិភាក្សាអំពីសង្គ្រាម បន្ទាប់ពីប្រធានាធិបតីអាមេរិក លោក Donald Trump បង្ហាញកាយវិការបង្កើនទំនាក់ទំនងជាមួយទីក្រុងមូស្គូ។ 

ក្នុងវីដេអូមួយដែលត្រូវបានបង្ហោះនៅលើបណ្ដាញសង្គម X លោក Tusk បាននិយាយថា៖ «យើងមិនអាចយល់ស្រប ចំពោះការព្រមចុះញ៉មរបស់អ៊ុយក្រែន ចំពោះរុស្ស៊ីបានឡើយ។ ទោះជាយ៉ាងណាក៏ដោយចុះ ពួកយើងហៅវាថា ជាការទាមទារដោយឥតអៀនខ្មាស ក្នុងនោះរួមទាំងការទាមទារដែនដីផងដែរ»។

សមាជិកក្រុមប្រឹក្សា EU នៃមេដឹកនាំជាតិ នឹងស្តាប់ការពន្យល់ពីប្រធានាធិបតីបារាំង លោក Emmanuel Macron ក្នុងដំណើរទស្សនកិច្ចរបស់លោក នៅសប្តាហ៍នេះ ទៅកាន់ទីក្រុងវ៉ាស៊ីនតោន ជាកន្លែងដែលលោកបានជួបលោក Trump។

លោក Macron និង Trump បានបង្ហាញការយល់ឃើញផ្ទុយស្រឡះពីគ្នាយ៉ាងខ្លាំងក្លា កាលពីថ្ងៃចន្ទ ក្នុងវិធីសាស្រ្តរបស់ពួកលោក ចំពោះបញ្ហាអ៊ុយក្រែន ដោយបញ្ជាក់ពីការបែកបាក់ រវាងសហរដ្ឋអាមេរិក និងអឺរ៉ុប ជុំវិញកិច្ចប្រឹងប្រែងរបស់លោក Trump ដើម្បីឲ្យមានកិច្ចព្រមព្រៀងបទឈប់បាញ់យ៉ាងឆាប់រហ័សជាមួយរុស្ស៊ី។

លោក Tusk បាននិយាយថា៖ «ពួកយើងទាំងអស់គ្នាសង្ឃឹមថា នឹងបានបញ្ចប់សង្រ្គាមយ៉ាងឆាប់រហ័ស ហើយអឺរ៉ុបចង់បានន័យដ៏ច្បាស់លាស់បំផុតតាមដែលអាចធ្វើទៅបាន»៕