ប្រព័ន្ធផ្សព្វផ្សាយកូរ៉េខាងត្បូង បានរាយការណ៍នៅថ្ងៃព្រហស្បតិ៍ (២៧ កុម្ភៈ) នេះដោយដកស្រង់ពីទីភ្នាក់ងារស៊ើបការណ៍សម្ងាត់របស់ទីក្រុងសេអ៊ូលថា កូរ៉េខាងជើង បានដាក់ពង្រាយកងទ័ពបន្ថែមទៀតទៅកាន់រុស្ស៊ី ប៉ុន្តែទំហំនៃកងកម្លាំងនេះមិនត្រូវបានគេដឹងភ្លាមៗនោះទេ។

សេចក្ដីរាយការណ៍បាននិយាយថា ទាហានបន្ថែមត្រូវបានបញ្ជូនទៅកាន់សមរភូមិក្នុងតំបន់ Kursk របស់រុស្ស៊ី ជាទីដែលកងកម្លាំងទីក្រុងមូស្គូ កំពុងប្រយុទ្ធជាមួយទាហានអ៊ុយក្រែន ដែលបានវាយប្រហារឆ្លងកាត់ព្រំដែនចូលទៅក្នុងតំបន់ភាគខាងលិចរបស់រុស្ស៊ីមួយនេះ។

ចារកម្មកូរ៉េខាងត្បូង ធ្លាប់បាននិយាយកាលពីមុនថា កូរ៉េខាងជើង បានដាក់ពង្រាយទាហានជាង ១១.០០០នាក់ ទៅកាន់ប្រទេសរុស្ស៊ី ដើម្បីប្រយុទ្ធក្នុងសង្គ្រាមអ៊ុយក្រែន ខណៈអ្នកជំនាញអ៊ុយក្រែន និងលោកខាងលិចនិយាយថា កងកម្លាំងរុស្ស៊ីក៏បានប្រើប្រាស់អាវុធកូរ៉េខាងជើងផងដែរ។

កូរ៉េខាងជើង មិនបានទទួលស្គាល់ជាផ្លូវការនូវការគាំទ្រយោធារបស់ខ្លួនសម្រាប់រុស្ស៊ីក្នុងសង្គ្រាមអ៊ុយក្រែននោះទេ ខណៈទីក្រុងមូស្គូ ក៏មិនបានច្រានចោល ឬបញ្ជាក់ពីវត្តមានទាហានរបស់ទីក្រុងព្យុងយ៉ាង នៅលើទឹកដីខ្លួននោះដែរ៕